Badminton bu gün dünyada ən dinamik və tamaşası maraqlı idman növlərindən biri kimi tanınır. Lakin onun tarixi çox qədim dövrlərə gedib çıxır.

Baki-baku.az xəbər verir ki, hələ qədimdə Çin, Yaponiya və Hindistanda müasir badmintonu xatırladan oyunlar mövcud idi. Çində “czianczi” adlı oyunda lələkdən hazırlanmış volanı ayaqlar vasitəsilə havada saxlamaq lazım idi. Yaponiyada raketkalardan istifadə edilən “hanetsuki” oyunu məşhur idi. XIX əsrin Hindistanında isə “puna” adlı oyun böyük maraq doğururdu – burada volan raketkalarla o tərəfə-bu tərəfə ötürülürdü, demək olar ki, bugünkü badminton kimi.

Məhz “puna” gələcək badmintonun əsası oldu. Hindistanda xidmət edən britaniyalı zabitlər bu oyuna maraq göstərdilər və onu Avropaya gətirdilər. 1873-cü ildə İngiltərədə yerləşən Badminton-house malikanəsində keçirilən dəvət axşamında yeni əyləncə ictimaiyyətə təqdim olundu. Elə həmin vaxtdan oyun “badminton” adı ilə tanındı.

İki onillikdən sonra, 1893-cü ildə İngiltərədə Badminton Assosiasiyası yaradıldı və ilk dəfə qaydalar sistemləşdirildi. Artıq 1934-cü ildə Beynəlxalq Badminton Federasiyası (IBF) təsis olundu. Təşkilata İngiltərə, Kanada və Danimarka da daxil olmaqla doqquz ölkə üzv idi.

XX əsrdə oyun böyük populyarlıq qazandı, xüsusilə Asiyada. Çin, İndoneziya, Cənubi Koreya və Malayziya bu idman növünün əsas inkişaf mərkəzlərinə çevrildi və bu ölkələrin idmançıları bu gün də dünyanın ən nüfuzlu arenalarında inamla liderlik edirlər.

Badminton Olimpiya Oyunlarında ilk dəfə 1972-ci ildə nümayiş etdirici idman növü kimi təqdim olundu. 1992-ci ildə isə Barselonada keçirilən Olimpiadada rəsmi idman növü statusu qazandı.

Bu gün badminton dünyanın hər yerində milyonlarla həvəskar və peşəkarı birləşdirir. Bu idman növündə qədim ənənələrlə müasir nailiyyətlər qovuşur və o, planetin ən kütləvi və tamaşası maraqlı idman növlərindən biri kimi inkişafını davam etdirir.

Murad Muxtarov