Alimlər süni intellektdən istifadə edərək DNT viruslarını hazırlayıb və maraqlı nəticələr əldə ediblər. Aparılan tədqiqatda yaradılan 302 virus nümunəsindən 16-sı bağırsaq çöpü bakteriyalarını məhv etməkdə təbii viruslardan daha effektiv olub.

Baki-baku.az xəbər verir ki, məlumatlar “Bio Rxiv” portalına istinadən yayımlanıb.

Tədqiqatçılar bildirirlər ki, bu kəşf elmi baxımdan böyük əhəmiyyət daşısa da, ciddi narahatlıqlar da doğurur. Ekspertlər qeyd edirlər ki, belə texnologiyalar gələcəkdə yeni növ bioloji silahların hazırlanmasına səbəb ola bilər və nəticələri təhlükəli ola bilər.

Alimlər həmçinin vurğulayırlar ki, süni intellektin bioloji tədqiqatlarda istifadəsi insan sağlamlığı və təhlükəsizliyi baxımından etik və hüquqi suallar yaradır. Buna görə də texnologiyanın nəzarətsiz istifadəsi ciddi risklərə yol aça bilər.

Bu kəşf elmi inqilab kimi qiymətləndirilsə də, həm də potensial təhlükə yaradır və dünya alimlərini biotexnologiya sahəsində yeni nizamlayıcı tədbirlər görməyə vadar edir.