Mançester Universitetinin alimləri müəyyən ediblər ki, gündəlik nar ekstraktının qəbulu 55–70 yaş arası insanlarda “gənclik hormonu” IGF-1-in səviyyəsini artırır.

Baki-baku.az-ın məlumatına görə, tədqiqatın nəticələri “Nutrients” jurnalında dərc olunub.

12 həftə davam edən eksperimentdə 72 könüllü iştirak edib. Onlar gündəlik olaraq ya 740 mq nar ekstraktı kapsulu, ya da plasebo qəbul etmək üçün iki qrupa bölünüblər.

Tədqiqatın sonunda birinci qrupun iştirakçılarında IGF-1 hormonunun səviyyəsi xeyli yüksəlib. Bu hormon – insulinəbənzər böyümə faktoru 1 – hüceyrələrin böyümə və yenilənməsinin tənzimlənməsində, əzələ və sümüklərin möhkəmləndirilməsində, həmçinin damar sistemi və beynin fəaliyyətinin yaxşılaşmasında mühüm rol oynayır. Yaş artdıqca IGF-1-in səviyyəsi adətən azalır ki, bu da fiziki gücün itirilməsi, həyat tonusunun zəifləməsi və müxtəlif xəstəliklərin riskinin artması ilə əlaqələndirilir.

Araşdırma həmçinin göstərib ki, nar ekstraktı telomerlərin uzunluğuna əhəmiyyətli təsir göstərməyib. Telomerlər xromosomların son uclarında yerləşən və DNT nukleotidlərinin təkrar ardıcıllığından ibarət hissələrdir. Bəzən telomerləri xromosomun “qoruyucu qapaqları” da adlandırırlar. Əvvəlki elmi işlər göstərib ki, telomerlərin vəziyyəti hüceyrə qocalmasının sürətini əks etdirir.

Alimlər qeyd edirlər ki, nar ekstraktının cavanlaşdırıcı təsirini təsdiqləmək üçün əlavə uzunmüddətli araşdırmalar aparılmalıdır. Gələcək eksperimentlər həm də onun insan üçün mümkün risklərini istisna etməyə kömək edəcək.