Mütəxəssislər xəbərdarlıq edirlər: şəkərli qazlı və spirtli içkilərin müntəzəm istifadəsi saçların tökülməsi və erkən ağarması riskini artırır.

Baki-baku.az xəbər verir ki, bu barədə “Nutrition and Health” (“NutritHealth”) elmi jurnalında dərc olunan yeni araşdırmanın nəticələrində qeyd olunur.

Alimlər 17 elmi tədqiqatın meta-analizini apararaq ABŞ, Avropa və Asiyadan olan 61.000-dən çox insanın sağlamlıq və qidalanma vərdişlərini təhlil ediblər. Nəticələr göstərib ki:

D vitamini və dəmir ilə zəngin qidalar saç böyüməsini dəstəkləyir və alopesiyanın qarşısını alır.
Şəkərli və alkoqollu içkilər isə saç tökülməsi və erkən saç ağarması ilə əlaqələndirilir.

Araşdırmada həmçinin bildirilib ki, brokoli, kələm və digər xaççiçəklilər fəsiləsindən olan tərəvəzlər, eləcə də bəzi kompleks qida əlavələri saç sağlamlığına müsbət təsir göstərir. Lakin bəzi klinik sınaqların keyfiyyəti hələ ki, kifayət qədər yüksək deyil.

Müəlliflər vurğulayırlar ki, bu nəticələr birbaşa səbəb-nəticə əlaqəsini sübut etmir, sadəcə güclü əlaqələrə işarə edir. Buna baxmayaraq, mütəxəssislər saç tökülməsindən əziyyət çəkən insanlara aşağıdakıları tövsiyə edir:

Qanda D vitamini və ferritin (dəmir ehtiyatı) səviyyəsini yoxlamaq
Zəruri hallarda bu çatışmazlıqları aradan qaldırmaq
Şəkərli və spirtli içkilərin istehlakını azaltmaq

Mütəxəssislər hesab edir ki, bu addımlar həm dermatoloji müalicəni dəstəkləyir, həm də saç sağlamlığını qorumaq üçün sadə, effektiv və əlçatan strategiyalardır.