Beynəlxalq Təbiəti Mühafizə İttifaqı (IUCN) zürafələrin əvvəlki təsnifatını yenidən nəzərdən keçirərək bu heyvanları bir növ kimi qəbul edən yanaşmadan imtina edib və onları dörd ayrı növ kimi tanıdığını ilk dəfə rəsmi şəkildə açıqlayıb.
Baki-baku.az xəbər verir ki, tarixən zürafələr bir növ və doqquz yarımnöv kimi təsnif edilirdi, lakin bu məsələ uzun illərdir alimlər arasında müzakirə mövzusu idi.
2024-cü ildə zürafələrlə bağlı son genetik, morfoloji və biocoğrafi məlumatları kompleks şəkildə təhlil etmək üçün xüsusi işçi qrupu yaradılıb. Bu qrup müxtəlif elmi mənbələrdə dərc olunmuş çoxsaylı tədqiqatları araşdıraraq zürafə xəttləri arasında əhəmiyyətli fərqlərin olduğunu müəyyən edib və onların müstəqil növlər kimi tanınmasını əsaslandırıb.
Hazırda alimlər aşağıdakı dörd zürafə növünü ayırırlar:
Şimal zürafəsi (Qərbi Afrika, Kordofan və Nübiya yarımnövləri ilə),
Torlu (retikulyar) zürafə,
Masai zürafəsi (Masai və Tornikroft zürafələri ilə),
Cənub zürafəsi (Cənubi Afrika və Anqola yarımnövləri ilə).
Mütəxəssislərin fikrincə, bu yeni təsnifat təbiəti mühafizə sahəsində mühüm əhəmiyyət daşıyır: o, müxtəlif Afrika regionlarında yaşayan zürafələrin qarşılaşdığı təhdidlərin daha dəqiq qiymətləndirilməsinə və onların qorunması üçün effektiv tədbirlərin hazırlanmasına imkan verəcək.
Yenilənmiş təsnifat Qırmızı Siyahının gələcək qiymətləndirmələri üçün əsas olacaq və zürafələrin sayının daha da azalmasının qarşısını almağa yönəlmiş milli və beynəlxalq təbiət mühafizə siyasətinə təsir göstərəcək.
IUCN-in hesabatı 9–15 oktyabr tarixlərində Əbu-Dabidə keçiriləcək Ümumdünya Təbiəti Mühafizə Konqresi ərəfəsində dərc olunub. Konqresdə hökumət nümayəndələri, vətəndaş cəmiyyəti, yerli xalqların təşkilatları, akademik dairələr və biznes sektorunun təmsilçiləri iştirak edəcək və növbəti onilliklər üçün təbiətin qorunması və dayanıqlı inkişaf strategiyasını müəyyənləşdirəcəklər.
1948-ci ildə yaradılmış Beynəlxalq Təbiəti Mühafizə İttifaqı (IUCN) dünyanın ən böyük ekoloji şəbəkəsidir və 1400-dən çox təşkilatı, 17 000 eksperti bir araya gətirir. IUCN nəsli kəsilmək təhlükəsi altında olan növlərin Qırmızı Siyahısını aparır və biomüxtəlifliyin qorunması sahəsində qlobal nüfuz sahibi hesab olunur.
