Təsəvvür edin ki, magistralda hərəkət edirsiniz və qəfil avtomobilinizin təkərlərinin altından musiqi səslənməyə başlayır. Bu, nə radiodur, nə də dinamikdən yüksələn mahnı səsi – yolun özü musiqi alətinə çevrilir.

Baki-baku.az xəbər verir ki, belə “musiqili yollar” asfaltın üzərində xüsusi kəsintilər vasitəsilə qurulur. Onların dərinliyi və aralarındakı məsafə elə hesablanıb ki, müəyyən sürətlə hərəkət edərkən təkərlərdən ötürülən vibrasiya ritmə və notlara çevrilir.

İlk belə magistral 1995-ci ildə Danimarkada yaradılıb və “Asfaltfon” adını alıb. Bu cür musiqili yollar xüsusilə Yaponiyada çox salınıb və onlar turistlər üçün əsl attraksiona çevrilib. Cənubi Koreyada isə belə sahələr əsasən monoton şosse yollarında tətbiq olunur ki, sürücülər sükan arxasında yuxuya getməsin.

Bu gün bu tip yollar adi səyahəti açıq səma altında konsertə çevirir və bir daha sübut edir: hətta asfalt belə incəsənət və əyləncə mənbəyi ola bilər.