“Çay pulu” qoymaq (el dilində çayavoy) ənənəsi İngiltərədə yaranıb və sonra bütün dünyaya yayılıb. Bəs niyə bəzi insanlar səxavətlə çay pulu verirlər, digərləri isə yox? Və nə üçün bəzi ölkələrdə xidmət sahəsində çalışan işçilərə əlavə mükafat verilməsi yaxşı qarşılanmır?
Baki-baku.az bildirir ki, “Çay pulu” anlayışı XVI əsrdə İngiltərədə meydana gəlib. Məhz o vaxt ingilislər çay içmək ənənəsini formalaşdırıblar və əgər qonaqlar ev sahibinin evində gecələyirdilərsə, onun qulluqçularına pul buraxırdılar.
“Çay pulu” fenomeni iqtisadçıların uzun müddətdir maraq dairəsindədir: axı əlavə ödəniş etmək, xüsusən də bunu qanun tələb etmirsə, şəxsi maraqlarımıza zidd görünə bilər, deyilmi?
Əgər çox səyahət edirsinizsə, yəqin ki, hər ölkədə bununla bağlı öz qaydalarının olduğunu bilirsiniz.
Amerika Birləşmiş Ştatlarında ofisianta hesabın 15-25%-i qədər, Braziliyada 10%, İsveçdə isə 5-10% arasında çay pulu vermək adətdir. Azərbaycanda isə bu, yazılmamış qanun kimi hesabın 10%-i kimi nəzərdə tutulur. Bəzi restoranlarda son dönəmlərdə “çay pulu”nu rəsmiləşdirib, hesabda “servis haqqı” kimi sırıyırlar. Amma “çay pulu” həmişə könüllü olub.