ABŞ-nin Vermont ştatında dünyanın ən qeyri-adi qəbirstanlıqlarından biri yerləşir — Dondurma Qəbirstanlığı.

Bu qeyri-adi məkan, şirin dadlar ustaları kimi tanınan “Ben & Jerry’s” şirkəti tərəfindən yaradılıb. Burada müxtəlif səbəblərlə satışdan çıxarılmış dondurma növləri üçün bir növ muzey-memorial qurulub.

Baki-baku.az xəbər verir ki, bu “buzlu nekropolda” hər bir keçmiş dondurma dadına xüsusi yazılı başdaşı qoyulub. Hər bir başdaşında, vaxtilə hit olacağı gözlənilən, lakin ümidləri doğrultmayan bir dadın xatirəsi əbədiləşdirilib.

Məsələn, burada məşhur “White Russian” kokteylindən ilhamlanmış araq və qəhvə likörü dadlı dondurmanın “məzarını” görmək olar.

Keçmişin dadlarına həsrət qalanlar üçün Ben & Jerry’s rəsmi saytında xüsusi bir virtual səsvermə də təşkil edib. İstənilən şəxs sevdiyi, lakin artıq istehsal olunmayan dondurmanı seçərək ona yenidən həyat verməyə cəhd göstərə bilər — sadəcə kifayət qədər səs toplamaq kifayətdir.

Bu qəbirstanlıq təkcə maraqlı marketinq üsulu deyil, həm də real turistik məkan kimi məşhurlaşıb. Turistlər bura yaradıcılığın abidəsi kimi baş çəkir, brendin pərəstişkarları isə bu məkanı “planetin ən şirin qəbirstanlığı” adlandırırlar.

Hacı Cavadov