Rusiya Ukrayna ilə danışıqların yeni raundlarının tezliklə keçirilməsində və danışıqları aparan ukraynalı şəxslərlə təmaslarda maraqlıdır.
APA-nın Moskva müxbirinin xəbərinə görə, bunu Kremlin mətbuat xidmətinin rəhbəri Dmitri Peskov bildirib.
"Rusiya tərəfi danışıqların davam etdirilməsində hələ də maraqlıdır. Rusiyanın mövqeyi son dərəcə aydındır və bu mövqe Ukrayna danışıqlarının iştirakçılarının diqqətinə çatdırılıb. Danışıqda iştirak edən ukraynalılar buna hazır olan kimi biz yeni raundların tezliklə keçirilməsində maraqlıyıq", - Peskov vurğulayıb.
Kremlin sözçüsü Türkiyənin Antalya şəhərində keçirilməsi planlaşdırılan Rusiya və Ukrayna XİN başçılarının görüşünə də münasibət bildirib: “Türkiyədə xarici işlər nazirlərinin gözlənilən görüşü danışıqlar prosesinin çox mühüm davamıdır. Gəlin qabağa qaçmayaq. Görüşü gözləyək”.
