Bu gün Kabil aeroportunun şimal girişində törədilən terror aktı nəticəsində azı 13 nəfər həlak olub.
Bu barədə Reuters agentliyi “Taliban” hərəkatının nümayəndəsinə istinadla məlumat yayıb. Məlumata görə, partlayış terrorçu-kamikadze tərəfindən törədilib. Ölənlər arasında uşaqlar da var. Bundan başqa, bir neçə talib xəsarət alıb. Partlayışın Britaniya qüvvələrinin məntəqəsi qarşısında baş verdiyi bildirilir.
Pentaqon hadisə nəticəsində “itkilər” olduğunu təsdiqləyib, lakin onların sayının dəqiqləşmədiyini bildirib. Bir qədər sonra ikinci partlayış barədə məlumat alınıb. Bu informasiyanı Türkiyə Müdafiə Nazirliyi təsdiqləyib.
Fox News telekanalı xəbər verib ki, partlayışdan sonra aeroport qarşısında atışma olub.
Xatırladaq ki, bir müddət öncə ABŞ və Böyük Britaniya öz vətəndaşlarını Kabil aeroportunu tərk etməyə, həyat və sağlamlığa təhlükə səbəbindən oraya getməkdən çəkinməyə çağırıb. Hər iki ölkə mümkün təhlükə barədə xəbərdarlığı çərşənbə günü gecə saatlarında edib.
