Moskva Şimali Kipr Türk Cümhuriyyətini (KKTC) müstəqil dövlət olaraq tanıyacağı təqdirdə Rusiya və Türkiyə Krımın statusu barədə razılığa gələ biləcəklər. "Bakı-Baku.az" xəbər verir ki, bunu Maltəpə Universitetinin professoru Həsən Ünal "Lenta.ru" ya müsahibəsində deyib.
H.Unal Rusiyanı KKTC-ni tanıma hərəkatının lideri olmağa çağırıb. Onun fikrincə, əgər Kipr birləşsə, NATO-nun bir hissəsi ola bilər ki, bu da Moskvanın maraqlarına uyğun deyil. "Rusiyanın cumhuriyyəti dərhal tanımasına ehtiyac yoxdur. Ölkə ətrafındakı digər ölkələrə müdaxilə etməmək və Şimali Kiprlə birbaşa ticarətə başlamaq kifayətdir", - deyə professor fikrinə aydınlıq gətirib.
Mütəxəssis bu qənaətdədir ki, əgər söylədikləri baş versə, Türkiyə Krımın Ukrayna ərazisi kimi tanınması ilə bağlı bəyanatlarından imtina edəcək və yerli aviaşirkətlər yarımadaya birbaşa uçuşları bərpa edəcəklər.
Professor onu da qeyd edib ki, hələlik hər iki ölkənin Krım və Kipr məsələsindəki mövqeləri səbəbindən belə bir plan gerçəkləşmir: "Ancaq siyasətçilərin danışıqlardan sonra daha güclü mövqe tutmaq üçün ritorikadan istifadə etdiyini unutmaq lazım deyil".
