Bu gün Rusiyanın Ermənistandakı Səfirliyi ilə BMT-nin İnkişaf Proqramının Ermənistandakı nümayəndəliyi arasında Azərbaycanla sərhəd olan Sünik, Heqarkunik və Vayoçdzor bölgələrində həssas icmalara və vətəndaşlara yardım göstərilməsini nəzərdə tutan layihə ilə bağlı anlaşma memorandumu imzalanıb. "Baki-Baku.az" erməni mediasına istinadən xəbər verir ki, dəyəri 3,2 milyon dollar olan layihə Rusiya hökuməti tərəfindən maliyyələşdiriləcək, onu BMT-nin İnkişaf Proqramı icra edəcəkdir.
"Layihənin əsas məqsədlərindən biri postkonflikt dövründə erməni icmasının çətinliklərini aradan qaldırmağa, onda özünüinamı möhkəmləndirməyə və inkişafına nail olmağa yönəlib. Biz başlıca strateji müttəfiq kimi buna böyük önəm veririk. Bu təşəbbüs Rusiyanın Ermənistanın sosial-iqtisadi inkişafı ilə bağlı kompleks tədbirləri çərçivəsində növbəti addımdır", - deyə Rusiyanın Ermənistandakı səfiri Sergey Kopırkin məsələyə şərh verib.
