Ermənistanın inzibati məhkəməsi yekun qərar çıxanadək Onik Qasparyanı Baş Qərargah rəisi vəzifəsində saxlamaq haqqında qərar qəbul edib.
APA-nın TASS-a istinadən verdiyi məlumata görə, bu barədə O. Qasparyanın vəkili Artur Ovannisyan bildirib.
“İnzibati Məhkəmə iddianın təmin olunması ilə bağlı tədbir görülməsi qərarını qəbul edib. Yəni, bu o deməkdir ki, Onik Qasparyan öz vəzifəsində qalır və yekun qərar çıxanadək öz səlahiyyətlərini icra etməyə davam edəcək. Bu qərar ona görə verilib ki, Baş Qərargah rəisi beş illik müddətə təyin olunur. Əgər Qasparyandan sonra yeni Baş Qərargah rəisi təyin olunsa, onda mənim müvəkkilimin pozulmuş hüquqlarının bərpa edilməsi mümkün olmayacaq”, - deyə vəkil vurğulayıb.
Onun sözlərinə görə, bu qərardan sonra O. Qasparyan sadəcə öz səlahiyyətlərini icra etməyə borcludur: “Mən bilmirəm ki, o, bu gün işə çıxıb, ya yox, lakin bu generalın birbaşa vəzifəsidir”.Qeyd edək ki, fevralın 25-də Ermənistanın Baş Qərargah rəisi Onik Qasparyan və bir sıra generallar Baş nazir Nikol Paşinyanın istefasını tələb ediblər. N. Paşinyan bunu hərbi çevriliş cəhdi adlandıraraq O. Qasparyanı vəzifəsindən azad edib.
