Ermənistanın baş naziri Nikol Paşinyan ölkə prezidenti Armen Sarkisyana Artak Davtyanın Silahlı Qüvvələrin Baş Qərargah rəisi təyin edilməsi barədə təqdimat verib. "Baki-Baku.az" xəbər verir ki, bunu N.Paşinyanın mətbuat katibi Mane Gevorqyan deyib.
Qeyd edək ki, Artak Davtyan 24 may 2018-ci il tarixdən 8 iyun 2020-ci il tarixədək Baş Qərargah postunda olub. O, ötən ilin iyulun 16-da Hərbi Sanaye Komitəsinin sədri təyin edilib. Noyabrın 11-də isə bu postdan istefa verib.
Onu da deyək ki, A.Davtyan bu günlərdə Baş Qərargahın xüsusi məsələlər üzrə böyük zabiti təyin edilmişdi.
İndi əsas məsələlərdən biri prezident Sarkisyanın Paşinyanın təqdimatına razılıq verməsidir. İş orasındadır ki, Sarkisyan Paşinyanın Baş Qərargah rəisi Onik Qasparyanın işdən azad edilməsi ilə bağlı təqdimatını imzalamayıb, məsələnin qanunauyğunluğunun yoxlanılması üçün sənədi Konstitusiya Məhkəməsinə göndərib. Konstitusiya Məhkəməsindən cavabın olmadığı bir durumda baş nazirin yeni baş qərargah rəisi təyin etdirmək istəyi ziddiyyətləri dərinləşdirməyə bilməz.
Bu arada prezident Sarkisyanın köməkçisi Asmik Petrosyan baş nazirin təklifini aldıqlarını və məsələyə 3 gün rəzində reaksiya veriləcəyini deyib.
