Ermənistan Silahlı Qüvvələri Baş Qərargah rəisi Onik Qasparyan martın 10-dan öz vəzifəsindən azad edilmiş sayılır.
APA-nın “Sputnik”ə istinadən xəbərinə görə, bu barədə Ermənistanın baş naziri Nikol Paşinyanın Ermənistan hökumətinin saytında yayımlanan bəyanatında deyilir.
Bəyanatda qeyd edilib ki, Ermənistan Prezidenti bu məsələ ilə əlaqədar Baş nazir tərəfindən təqdim olunan fərman layihəsini imzalamadığı və qanunla müəyyən edilmiş müddətdə Konstitusiya Məhkəməsinə müraciət etmədiyi üçün O. Qasparyan 10 mart tarixindən etibarən vəzifəsindən azad edilmiş sayılır.
Bu məsələ ilə bağlı maraqlı məqamlardan biri də Ermənistan Prezident Administrasiyasının dünən yaydığı açıqlamadır. Orada bildirirlir ki, Prezidentin bu məsələ ilə bağlı Konstitusiya Məhkəməsinə müraciət etmək hüququna dair vaxt martın 10-u ilə məhdudlaşmır. Yəni prezident istənilən vaxt müraciət edə bilər.
"Baki-Baku.az" xəbər verir ki, artıq Ermənistan prezidenti Konstitusiya Məhkəməsinə müraciət edib. Prezident Baş qərargah rəisi O.Qasparyanın işdən azad edilməsinin hərbi qanunvericiliyə uyğunluğunu yoxlamasını istəyib. Yekun qərarı Konstitusiya Məhkəməsi verəcək.
