Biz məğlubiyyətin dərin köklərini başa düşməliyik. "Baki-Baku.az" xəbər verir ki, bunu Ermənistanın baş naziri Nikol Paşinyan ölkə mediasına dünən verdiyi müsahibəsində deyib.
Ermənistanın ikinci prezidenti Robert Koçaryan bir müddət öncə bildirmişdi ki, əgər o, ölkə rəhbəri olsaydı, Azərbaycan hücuma keçməyə cəsarət etməzdi.
Paşinyan jurnalistin bununla əlaqədar sualını cavablandırarkən vurğulayıb ki, 2020-ci ilin sentyabr, oktyabr və noyabr aylarında Ermənistana rəhbərlik edən istənilən şəxs belə bir fikir işlədə bilər. Heç kəs də əksini isbatlamaq gücündə deyil.
"Sorğu keçirək? Kimliyindən asılı olmayaraq, istənilən şəxs deyə bilər ki, o, ölkəyə rəhbərlik etsəydi, Azərbaycan hücuma cəsarət etməzdi, biz məğlub olmazdıq və s. Ancaq biz eyni zamanda məğlubiyyətin dərin köklərini başa düşməliyik. Yaxşı, əgər bu məğlubiyyət son iki ilin və ya iki ayın ərzində baş verdisə, gəlin, bunu sübuta yetirək", - deyə Paşinyan fikrinə aydınlıq gətirib.
