- Daxili siyasət
- 13:27 21.09.2024
Ermənistanın üçüncü prezidenti Serj Sarkisyanın müsahibəsində çoxsaylı təzadlı iddialar var idi. "Baki-Baku.az" xəbər verir ki, bunu hakim "Mənim addımım" fraksiyasının rəhbəri Lilit Makunç jurnalistlərə açıqlamasında S.Sarkisyanın 2018-ci ildən sonrakı hərəkatın anti-Qarabağ meylli olmasına dair fikirlərini şərh edərkən bildirib.
L.Makunçun sözlərinə görə, Sarkisyanın müsahibəsi çoxsaylı suallar yaradır. "Məsələn, müsahibədəki fikirlər Serj Sarkisyanın və onun komandasının siyasi baxışlarında yer almayıb. O fikirlər 2017-ci ildə seçkidən öncəki dövrdə də, 2018-ci ilin seçki kampaniyası müddətində də, 2019-cu ildə də, 2020-ci ildə də olmayıb. Bundan başqa əvvəlki açıqlamalarla ziddiyyət təşkil edən tezislər var. Burada sual yaranır - nəyə görə bu barədə yalnız indi danışılır? Onlar bu müddətdə nəyi gözləyirdilər? Nəyə görə bu müsahibə məhz indi ona ehtiyacın olmadığı dövrdə təşkil olunub?", - deyən Makunç Sarkisyanın Dağlıq Qarabağ münaqişəsinin tənzimlənməsi ilə bağlı söylədiklərini nəzərdə tutaraq mövqeyini bölüşüb.
Serj Sarkisyanın yeni hakimiyyətə gələnlərin pilotsuz uçuş aparatlarının alınmasından imtina etdiklərinə dair fikirlərini şərh edən Makunç daha bir ziddiyyətli məqama diqqət çəkib və vurğulayıb: "Əgər o, Kazan sənədini imzalamaq üçün baş nazir olmaq istəyirdisə, o zaman PUA-ların alınmasına nə ehtiyac var idi? Üçüncü prezidentin bu iki iddiası arasında ziddiyyət varmı? Əlbəttə var. Belə olan halda mənim üçün bunlardan hansına münasibət bildirib mövqe ortaya qoymaq çətindir. Buna görə də istəməzdim ki, məsələni şərh edim".