Ermənistanın tanınmış politoloqu, Demokratiya Naminə Əməkdaşlıq Mərkəzinin sədri Stepan Danielyan ölkə ictimaiyyətinə aşağıdakı sualları ünvanlayıb və bildirib ki, bu Qarabağla bağlı nəyin baş verdiyini müəyyənləşdirmək üçün bu suallara cavab tapmaq lazımdır:
"Biz nəyə görə müharibədə tək qaldıq?
Nəyə görə Britaniya BMT-nin Təhlükəsizlik Şurasında atəşkəslə bağlı qətnaməyə veto qoydu?
Nəyə görə ABŞ atəşkəs müqabilində neytral sülhməramlılar təklif etdi, sonra kənara çəkildi, daha sonra isə Rusiyanın məlum şərtlərlə atəşkəs əldə edilməsindəki səylərini alqışladı?
Nəyə görə Putin qərarın ATƏT-in Minsk Qrupu ilə razılaşdırılmasında təkid etdi? Bu halda Minsk Qrupu daxilində ziddiyyətlərin olması ilə bağlı söhbətlər təkzib olunur.
Boltonun (ABŞ prezidentinin milli təhlükəsizlik üzrə müşaviri Con Bolton nəzərdə tutulur. 2019-cu ilin sentyabrındə vəzifədən azad edilib- red.) 2018-ci ildəki təklifləri ilə sonra baş verənlər arasında fərq nədir? Rusiya nəyi realizə etdi? Əslində Boltonun bütün tələbləri yerinə yetirildi.
Belə desək, Lavrov planı ilə Bolton planı arasında fərq nədədir?
"Əgər hesab etsək ki, hakimiyyət dəyişikliyi (2018-ci ildə Ermənistandakı) Rusiya əleyhinə idi, o zaman nə üçün parlamentin Qərbin təsirində olduğu şübhə doğurmayan deputatları "Rusiya KQB-sinin şpionu" Nikolun təşəbbüslərini dəstəkləyirlər?
Nəyə görə 19 oktyabrda və daha əvvəl müharibə başa çatmadı?"
Qeyd edək ki, S.Danielyan Azərbaycan cəmiyyəti üçün tanış mənfi simadır. O, ötən il noyabrın 7-də özünün facebook səhifəsində yazmışdı ki, Azərbaycana gedən bütün çay sularını zəhərləmək lazımdır. Onun bu səpgidə olan başqa açıqlamaları da var.
