Gizliliyi aşkara çıxarılmış sonuncu sənəd Sünik vilayətindəki Gorus-David bek yolunun 21 kilometrinin Azərbaycana verilməsi ilə bağlıdır. "Baki-Baku.az" xəbər verir ki, bununla əlaqədar məlumatı Ermənistanın "Qraparak" nəşri yayıb.
Məlumatda bildirilir ki, sözügedən sənəddə göstərilən məsələ haqqında birbaşa müddəa yer almasa da, ikitərəfli razılığa əsasən yolun müəyyən hissəsini Azərbaycan və Ermənistan birlikdə istismar edəcək. Rusiya sülhməramlıları isə təhlükəsizlik təminatına cavabdeh olacaqlar. Üç ildən sonra isə erməni tərəfi öz ərazisindən keçən yol çəkməlidir. Bundan sonra 21 kilometrlik ərazi tamamilə Azərbaycana veriləcək. "Qraparak" yazır ki, məhz bununla bağlı razılıq Ermənistanın baş naziri və müdafiə nazirinin iştirakı ilə əldə olunub: "Xüsusən də müdafiə naziri Vaqarşak Arutyunyan Azərbaycanın bütün tələblərinin qeyd-şərtsiz yerinə yetirilməsinin tərəfdarıdır ki, bu, hətta Rusiya tərəfini də təəccübləndirib".
Nəşrin diqqət çəkdiyi daha bir məqam var. Qəzet öz mənbələrinin məlumatına söykənərək Rusiyanın xarici işlər naziri Sergey Lavrovun şəxsi söhbətlərdə ermənilərə guya aşağıdakı szöləri dediyini yazır. "Əgər sizinkilər öz torpaqlarını verirlərsə, biz nə üçün buna qarşı olmalıyıq. Özünüz qərar verin".
