Ermənistanın üçüncü prezidenti Serj Sarkisyanın "Armnews" telekanalına müsahibəsində səsləndirdiyi 5+2 formulu ilə Azərbaycana torpaqların qaytarılmasının danışıqlar prosesində vacib məqamlardan biri olduğunu vurğulaması ölkənin siyasi dairələrindən narazılıq doğurub. Bu baxımdan "İşıqlı Ermınistan" Partiyasının sədri, deputat Edmon Marukyanın söylədikləri xüsusilə diqqət çəkir.
Marukyan bildirib ki, illərlə davam edən danışıqlar prosesində istənilən halda Azərbaycana torpaq qaytarılması qırmızı xətlə keçirdisə, o zaman nəyə görə Zəngilan, Qubadlı üçün milyon dollarlar xərclənirdi, nə üçün Araz çayı yaxınlığında yeni şəhər salınmasına, Cəbrayıl üçün böyük məbləğlər ayrılırdı?
"Belə çıxır ki, bizim vətəndaşların vergiləri və pulu, diaspordan gələn vəsait Azərbaycana qaytarılmalı olan ərazilərə xərclənirdi. Biz elə varlı idik ki, onlar üçün şəhərlər və kəndlər tikirdik? Bundan başqa Laçında biznes qurulması, Kəlbəcər rayonunda su elektrik stansiyası tikilməsi üçün kredit olaraq bir neçə milyon dollar tapılmışdı. Azərbaycana qaytarılacaqdısa, dövlətin təminatı ilə banklardan böyük məbləğdə kredit götürməyin mənası nə idi? Bütün bu məsrəflərə nəyə görə gedilirdi, əgər 5+2 formuluna əsaslanaraq rayonların qaytarılması ilə bağlı danışıqlar gedirdisə?", - Marukyan özünün facebook səhifəsində yazıb.
