Azərbaycanla Ermənistan arasındakı 44 günlük müharibə Almaniya ordusunun təchizatındakı ciddi çatışmazlıqları ortaya çıxardı. "Baki-Baku.az" "haqqin.az"a istinadən xəbər verir ki, bu fikir Təhlükəsizlik Siyasəti üzrə Almaniya Akademiyasının təhlilində yer alıb. Sənəddə Qarabağ müharibəsi ilə əlaqədar müxtəlif məqamlara diqqət yetirilərək bildirilib ki, Almaniya ordusu da müharibədə məğlubiyyətə uğramış Ermənistan ordusu kimi Azərbaycanın qarşısında duruş gətirə bilməzdi. Hesabat müəllifləri bu rəyi pilotsuz uçuş aparatları amili ilə izah ediblər. Akademiya tərtib etdiyi sənədlə hərbi məmurlara PUA-ların tezliklə alınması üçün bir növ təzyiq göstərir.
Qarabağ müharibəsində PUA-larla məhv edilmiş erməni hərbi texnikasının siyahısının yer aldığı hesabat müəllifləri həmçinin Almaniyanın müdafiə naziri Annahret Kramp-Karrebbauerin 44 günlük müharibəni "tarixdə PUA-ların ilk əsl müharibəsi" adlandırması fikrinə də istinad edilib.
Qeyd edək ki, hesabatda Azərbaycanın PUA-ların müxtəlif növlərindən istifadə etməklə düzgün kəşfiyyat işi apardığı, ordunun sinxrom şəkildə fəaliyyət göstərdiyi, artileriyanın kəşfiyyat materiallarına əsasən düzgün hədəflər seçdiyi, bunun qarşısında ənənəvi zenit komplekslərindən istifadə edən Ermənistan ordusunun praktiki olaraq köməksiz duruma düşdüyü vurğulanıb. Sənəddə həmçinin Türkiyənin PUA-ların istehsalında son on il ərzində böyük uğurlar əldə etdiyi önə çəkilib, mövcud istiqamətdə statistik rəqəmlər açıqlanıb.
