Rusiyanın Ermənistandakı səfiri Sergey Kopırkin Ermənistan Respublikaçılar Partiyasının sədri, ölkənin üçüncü prezidenti Serj Sarkisyanla görüşüb. "Baki-Baku.az" "panorama.am"a istinadən xəbər verir ki, görüş Rusiya tərəfinin təşəbbüsü ilə gerçəkləşib və orada Qarabağ müharibəsi ilə əlaqədar məsələlər müzakirə edilib.
S.Sarkisyan Rusiyaya atəşkəsin əldə edilməsinə, saxlanılmasına və humanitar problemlərin aradan qaldırılmasındakı köməyə görə təşəkkürünü bildirib. O, eyni zamanda Qarabağ münaqişəsinin tam həlli üçün Moskvanın ATƏT-in Minsk Qrupu çərçivısində səylərini gücləndirməsinin vacibliyini vurğulayıb. Bu xüsusda o, baza prinsiplərini və "Dağlıq Qarabağ xalqının" öz müqəddaratını təyin etməsi məsələsini qabardıb.
Görüşdə həmçinin hərbi əsirlərin və digər şəxslərin Ermənistana qaytarılması, həlak olmuş hərbçilərin cəsədlərinin axtarılıb tapılması məsələsi də müzakirə edilib.
Məlumatda həmçinin bildirilib ki, səfir Kopırkinin xahişi ilə Sarkisyan ölkə daxili vəziyyətə və reginda qərarlaşmış yeni siyasi reallıqlara da münasibət bildirib. Ermənistanın üçüncü prezidentinin bununla bağlı nələri söylədiyi açıqlanmır.
Rusiyalı diplomatın da ölkəsinin müzakirə edilən məsələlərə dair baxışını açıqladığı vurğulanıb. Amma burada da Kopırkinin nədən bəhs etdiyi diqqətə çatdırılmır.
