Ermənistanın üçüncü prezidenti Serj Sarkisyan, ikinci prezident Robert Koçaryan, "Vətən" Partiyasının lideri Artur Vanesyan, "Daşnaqsutun" Partiyasının təmsilçisi İşxan Saqatelyan, "Çiçəklənən Ermənistan" Partiyasının sədri Qagik Çarukyan və "Vətənin müdafiəsi naminə" hərəkatının baş nazir postuna namizədi Vazgen Manukyan görüşüblər.
"Baki-Baku.az" xəbər verir ki, bu barədə məlumatı Ermənistanın media orqanları yayıblar. "Vətən" Partiyasının təmsilçisi Sos Akopyan "tert.am"a görüşün təfərrüratları barədə məlumat verib. O bildirib ki, görüşdə mövcud hakimiyyətə qarşı daha geniş mübarizə aparmaq məsələləri müzakirə edilib. Bu istiqamətdə hansı addımların atılacağına aydınlıq gətirilib.
Akopyan həmçinin deyib ki, görüşdə aksiya və mitinqləri davam etdirmək qərara alınıb. Onların davam etdirilməyəcəyinə dair yayılmış məlumatlar yalandır. Partiya təmsilçisi belə təmasların gələcəkdə də olacağını diqqətə çatdırıb.
