Ermənistanın ikinci prezidenti Robert Koçaryan növbədənkənar seçki olsa, prosesdə iştirak edəcək. "Baki-Baku.az" xəbər verir ki, bunu o, ölkənin kütləvi informasiya vasitələrinə müsahibəsində bildirib.
R.Koçaryan tərəfdarlarını siyasi proseslərdə aktiv iştiraka çağırıb. Özünə gəldikdə isə, deyib ki, "Mənim addımım" (baş nazir Nikol Paşinyanın partiyası) onu iki il həbsxanada saxlayıb.
"Belə hesab edirdilər ki, mənə hakimiyyət verilsə, qılıncımı çıxarıb sağdan-soldan onlardan intiqam alacam. Bu adamlar belə düşünürlər. Görünür, özləri elədirlər. Bu səbəbdən də proseslərdən kənarda idim. İstəmirdim ki, bir faktor kimi parlamentdəki 20-25 deputatın (öz partiyasının tərəfdarlarını nəzərdə tutur) qorxudulması üçün istifadə edilim", - deyən Koçaryan seçkiyə qoşulmaq üçün kifayət qədər ciddi komandasının mövcudluğuna baxmayaraq, prosesin daha sakit şəraitdə keçirilməsinin tərəfdarı olduğunu vurğulayıb.
R.Koçaryan həmçinin bildirib ki, indiki fikir ayrılıqlarınin qaldığı, bir sıra vacib suallara cavabın tapılmadığı şəraitdə seçkinin təşkili təhlükəlidir. "Yox əgər, seçki tez keçirilsə, mən mütləq iştirak edəcəm. İştirak etməmək düzgün olmaz. Əks halda biz bu adamlara yenidən öz hakimiyyətlərini qurmaq imkanı yaradacağıq. Əgər bu adamlar bu şəraitdə seçki keçriməyin təhlükəli olduğunu anlamırlarsa və seçki keçirəcəklərsə, o zaman onları ictimaiyyətlə təkbətək qoymaq olmaz. Bəli, biz iştirak edəcəyik və qələbə qazanacağıq. Mübarizə aparıb qələbə qazanacağıq", - deyə Koçaryan fikrinə aydınlıq gətirib.
