- Daxili siyasət
- 13:27 21.09.2024
"Biz ictimaiyyətin diqqətinə hakimiyyətin ört-basdır etmək istədiyi və gizlətdiyi məsələləri çatdırmalıyıq". Bunu Ermənistanın tanınmış rejissoru Ruben Ovannisyan bu gün ölkə qarşısında dayanan problemlərin elm, mədəniyyət və incəsənət xadimlərinin iştirakı ilə keçirilmiş müzakirəsində deyib.
R.Ovannisyan erməni hərbi əsir və girovlar məsələsi üzərində dayanıb. "Hakimiyyət deyir ki, 44 günlük müharibədə Ermənistan tərəfindən həlak olmuş, habelə əsir düşmüş şəxslərlə bağlı məlumat dövlət sirridir. O zaman bəs nəyə görə baş nazirin müavini Tiqran Avinyan parlamentin tribunasından həlak olanların təxmini sayını dedi? Mən yenə də eyni məsələyə qayıdıram. Onlar itkilərimizin sayını dəqiq deməlidirlər. Əsir götürülənlərin də, itkin düşənlərin də. Əvvəlki kimi hesab edirəm ki, böyük itki olmamağı üçün bizim övladlarımızın çoxunun cəsədi morqlarda saxlanılır", - deyən rejissor bu qənaətdədir ki, ölkə əhalisi ölənlərin sayını adbaad bilməlidir. Bu, dövlət sirri olmamalıdır. Əgər dövlət sirridirsə, hakimiyyət bunu sübuta yetirməlidir.
"Mən həlak olanların, əsir götürülənlərin və itkin düşənlərin valideynlərini tək qoymamağa çağırıram. Bilirəm ki, onların gedib türklərlə övladlarının tapılması üçün danışıq apardıqları hallar var. Necə də yazığım gəlir özümüzə", - deyən R.Ovannisyan əlavə edib ki, Ermənistanda aparılmış siyasət nəticəsində ölkə müharibədə məğlubiyyətə düçar oldu. "Düşmən bildi ki, o bizim üzərimizdə parçalanma yaratmaqla qalib gələ bilər. O bizimlə ermənicə danışdı, bizi ağlara və qaralara böldü. Biz qaralarıq, ancaq ağların gününü qara etməliyik".