Paşinyanın Şuşa ilə bağlı dediklərinə cavab olaraq etiraz aksiyası keçirilib

Ermənistanda baş nazir Nikol Paşinyandan etirazçılar üçün daha bir mövzu tapılıb. Onun Şuşa ilə bağlı söylədikləri narazılıq dalğasına yeni çalarlar gətirib desək, yanılmarıq. Bu gün ölkə parlamentinin qarşısında Paşinyanın məhz Şuşadan danışmasına hiddət aksiyası təşkil olunub. 

Qeyd edək ki, baş nazir yanvarın 20-də parlamentdə deputat Naira Zöhrabyanın sualına cavab olaraq bildirmişdi: "Münaqişəyə və azad edilməyənədək (işğaladək - red.) Şuşanın əhalisinin 90 faizdən çoxu azərbaycanlılar idi. İndi siz demək istəyirsiniz ki, əhalisinin 90 faizindən çoxunun azərbaycanlı olduğu Şuşa bu statusda erməni şəhəri olsun?". 

Aksiyaya qoşulanlar bu açıqlamanı Paşinyanın satqınlığının növbəti nümunəsi kimi qiymətləndiriblər. Onu istefaya getməyə səsləyiblər.