Ermənistan parlamentinin bu günə planlaşdırılmış iclası yetərsay olmadığı üçün təxirə salınıb. "Baki-Baku.az" erməni mediasına istinadən xəbər verir ki, iclasın təşkili üçün növbəti cəhd 3 saat sonra ediləcək.
Məlumatlara görə, iclas zalında cəmi beş-altı deputat olub. Bununla bağlı "İşıqlı Ermənistan" partiyasının sədri və parlamanet fraksiyasının rəhbəri Edmon Marukyan hakim "Mənim addımım" partiyasından olan vitse-spiker Lena Nazaryana üz tutub və deyib: "Ola bilərmi ki, hakim partiya öz fraksiyasının qapalı iclasında parlamentin işini iflic etmək barədə qərar qəbul edib və həmkarlarını hökumətin cavab verməli olduğu məsələlər barədə sual vermək imkanından məhrum edib?"
L.Nazaryan isə öz növbəsində hakim partiyanın parlament fraksiyasının rəhbəri Lilit Makuntsun sözlərini Marukyana çatdırıb. Belə məlum olub ki, parlamentin işini dayandırmaq barədə qərar həqiqətən də var. Ölkədə hərbi vəziyyət elan edilib, parlamentarilər yükləniblər. Buna görə qərara alındı ki, onlar işlərindən ayrılmasın.
