ABŞ-da prezident seçkiləri öncəsi namizədlər - hazırkı prezident Donald Tramp və sabiq vitse-prezident Co Bayden arasında son debat keçirilib və əvvəlkilər kimi gərginliyi və emossionallığı ilə yadda qalıb. Bu dəfəki debatda tərəflər bir-birilərini Rusiyaya meylli olmaqda günahlandırıblar.
Co Bayden deyib ki, Rusiya Trampın prezident seçilməsini istəyir. "Çünki mən onlar üçün sərfəli deyiləm. Mən onları tanıyıram, onlar da məni", - deyən Bayden hazırkı prezidenti Rusiyadan və Çidən pul almaqda ittiham edib.
Buna cavab olaraq isə Tramp daha konkret iddia səsləndirib. O bildirib ki, Bayden Rusiyadan 3,5 milyon dollar alıb. "Co Rusiyadan 3,5 milyon dollar alıb. Pullar Putin vasitəsilə gətirilib. Sən Rusiyadan 3,5 milyon dollar almısan. Sənin ailən 3,5 milyon dollar alıb. Nə vaxtsa sən bunu izah etmək məcburiyyətində qalacaqsan", - Tramp üzünü Baydenə tutaraq belə deyib.
