Ermənistanın baş naziri Nikol Paşinyan Almaniyanın məhşur "Bild" qəzetinə açıqlamasında bildirib ki, Rusiyanın Ermənistanla imzaladığı sazişlərə sadiq qalacağına əmindir. Nəşrin Rusiyanın Ermənistana köməyi ilə əlaqədar sualını cavablandıran baş nazir Gümrü rayonunda Rusiyanın hərbi bazasının və hava hücumundan müdafiə sisteminin olduğunu xatırladıb.
"Bununla bağlı sazişdə dəqiq göstərilir ki, hansı hallarda bu hərbi qüvvələr Ermənistanın təhlükəsizliyi naminə istifadə edilə bilər. Mən əminəm ki, Rusiya əgər ehtiyac yaranarsa, üzərinə düşən öhdəliyi yerinə yetirəcək. Hərbi bazanın yerləşməsi ilə bağlı sazişdə bildirilir ki, Ermənistana xaricdən təhlükə Rusiya üçün təhlükə kimi qiymətləndiriləcək", - deyə Paşinyan bildirib.
Dağlıq Qarabağda Rusiyaya məxsus sülhməramlıların yerləşdirilməsinin mümkünlüyü ilə bağlı suala cavab verərkən, Paşinyan vurğulayıb ki, bu qərar geniş müstəvidə ATƏT-in Minsk Qrupu tərəfindən qəbul edilə bilər.
