Azərbaycan futbolçularından səfər qələbəsi VİDEO

Azərbaycanın futbol üzrə milli komandası UEFA Millətlər Liqasının ikinci turunda meydana çıxıb və səfərdə Kipr yığması üzərində 0-1 hesabı ilə qələbə qazanıb. Yeganə qolu matçın 29-cu dəqiqəsində komandamızın kapitanı Maksim Medvedyev vurub. 

Qeyd edək ki, Millətlər Liqasının bir neçə gün öncə baş tutmuş ilk turunda futbolçularımız doğma divarlar önündə Lüksenburqa 1-2 hesabı ilə uduzmuşdular. Kipr isə ilk turda öz meydanında Monteneqro millisinə iki cavabsız qolla yenilmişdi. Dünən komandamızla eyni vaxtda meydanda olan Lüksenburq və Monteneqro komandalarının duelindən də 0-1 hesablı qələbə ilə ayrılan Monteneqro idi. Beləcə komanda iki oyundan mütləq nəticə - 6 xal qazanmaqla C liqasının mütləq lideridir. Azərbaycan yığmasının Monteneqroya qarşı oyunu isə oktyabrın 10-da səfərdə baş tutacaq.