Fövqəladə hallar naziri general-polkovnik Kəmaləddin Heydərov Türk Dövlətləri Təşkilatına üzv və müşahidəçi ölkələrin Fövqəladə halların idarə edilməsi üzrə nazirlərinin İkinci iclasında iştirak etmək üçün ölkəmizə səfərə gəlmiş Qırğız Respublikasının fövqəladə hallar naziri Boobek Ajikeev ilə görüşüb.
Nazirliyin mətbuat xidmətindən bildirilib ki, görüşdə nazir K.Heydərov Qırğızıstan fövqəladə hallar nazirinin ölkəmizə səfərinin iki nazirlik arasında mövcud əlaqələrin daha da genişlənməsinə yeni təkan verəcəyinə əminliyini vurğulayıb.
2012-ci ildə imzalanmış “Azərbaycan Respublikası Hökuməti və Qırğız Respublikası Hökuməti arasında mülki müdafiə (mühafizə), fövqəladə halların xəbərdar edilməsi və aradan qaldırılması sahəsində əməkdaşlıq haqqında Saziş” çərçivəsində görülən işlərin əhəmiyyətinə toxunub. Nazir Qırğızıstan fövqəladə hallar nazirinin 2021-ci ilin dekabrında ölkəmizə uğurlu səfərini xatırladaraq, həmin səfər zamanı imzalanmış “Azərbaycan Respublikası Fövqəladə Hallar Nazirliyi və Qırğız Respublikası Fövqəladə Hallar Nazirliyi arasında 2022-2025-ci illər üçün perspektiv əməkdaşlıq Planı”nda yer alan müddəaların əhatə etdiyi əsas istiqamətlərdən danışıb.
Boobek Ajikeev Türk Dövlətləri Təşkilatına üzv və müşahidəçi ölkələrin Fövqəladə halların idarə edilməsi üzrə nazirlərinin İkinci İclası çərçivəsində Bakıya səfərinin iki qurum arasında əlaqələrin inkişafına əhəmiyyətli töhfə verəcəyini bildirib.
Qonaq həmin beynəlxalq sənədlər üzrə görülmüş işlərdən danışıb, münasibətlərin inkişafı üçün yaxşı imkanların mövcudluğunu vurğulayıb.
Görüşdə qarşılıqlı maraq doğuran digər məsələlər geniş müzakirə edilib.
