- Daxili siyasət
- 10:00 23.09.2024
"Milasda, Yeniköy İstilik Elektrik Stansiyası, Kəmərköy İstilik Elektrik Stansiyası yaxınlığında yanğınlar çox şiddətli olub. Bunların söndürməsində və mühafizəsində Azərbaycan Fövqəladə Hallar Nazirliyinin əməkdaşları böyük fədakarlıq göstəriblər".
APA-nın Türkiyəyə ezam olunan müxbiri xəbər verir ki, bunu fövqəladə hallar nazirinin müavini, general-leytenant Etibar Mirzəyev deyib.
Nazir müavini bildirib ki, ötən ayın 30-dan başlayaraq FHN-nin yanğın-xilasetmə qrupu 4 mərhələdə Türkiyənin Muğla vilayətinə gəlib: "Gəldiyimiz ilk günlərdə yanğınlara qarşı mübarizədə iştirak etmişik. Adıçəkilən bölgələrdə baş verən yanğınlar söndürülüb. Hal-hazırda həmin bölgələrdə əməkdaşlarımız növbəli rejimlə mühafizə işləri aparırlar".
E. Mirzəyev qeyd edib ki, əlavə olaraq qüvvələrimiz Göycəğiz rayonunun Pınar, Karayer, Kavvakçık, Çayhisar, Zeytunalanı, Otmanlar, Çöğənli yaylağı istiqamətində yanğınlarla mübarizə aparıb: "Yatağan bölgəsində, Hacıvelilər, Yumaklı, həmçinin, Aydın vilayətinin Çinə, Akçaova, Kabaklıdərə bölgəsində, Kabaklı-Hüseyn yaylasında, Seyidli-Kəmər bölgəsində, Menteşə mərkəzində, Qazeller, Muğlanın düzənlik sahəsi, Kozaağac, Yılanlı dağ silsiləsində yanğınların söndürülməsinə nail olmuşuq. Bundan başqa, Marmarisdə Orhaniyə, Hisarönü, Armudlu, Dəyirmanyanı, Açparan, Turqut, Fətiyyə bölgəsi, Dalaman hava limanı ətrafı, Dənizlinin Burduk, Tavas, Urduk-Bucak bölgəsində tapşırıqlar icra olunub".