- Daxili siyasət
- 09:59 25.04.2024
"Keçən ilki buraxılış imtahanı ilə builki imtahanı müqayisə edəndə builki nəticələr daha yüksəkdir".
APA-nın məlumatına görə, bunu Dövlət İmtahan Mərkəzinin Direktorlar Şurasının sədri Məleykə Abbaszadə bildirib.
Onun sözlərinə görə, bu, builki buraxılış imtahanlarında açıq sualların sayının 50 faiz azaldılması ilə əlaqədardır: "Bəlkə də şagirdlər imtahana daha yaxşı hazırlaşıb, vaxt baxımından imkanları daha çox olub. Statistik göstəricilərdə builki və ötənilki nəticələri müqayisə edəndə görürük ki, imtahan nəticələri təxminən eynidir. Bu il nə sıçrayış, nə də daha pis vəziyyət olub. İmtahanın təşkili isə daha mürəkkəb idi. İmtahanlara giriş çox ciddi təşkil olunmuşdu".
Bu il Bakı Ali Neft Məktəbi və Dövlət Gömrük Komitəsinin Akademiyasında plan yerləri 100 faiz dolub. Dövlət İmtahan Mərkəzinin Direktorlar Şurasının sədri Məleykə Abbaszadənin sözlərinə görə, Azərbaycan Milli Konservatoriyasında plan yerləri 98 faiz, Azərbaycan Dillər Universitetində 95 faiz, Bakı Dövlət Universitetində 93 faiz dolub: "Bunlar çox yüksək göstəricilərdir. Qəbul planı ən aşağı faizlə dolan Azərbaycan Kooperasiya Universitetidir - 62%, Azərbaycan Əmək və Sosial Akademiyası da aşağı faizlə dolan universitetlər sırasındadır. Bu il kifayət qədər subbakalavr da ali məktəblərə qəbul olunub. Ən çox subbakalavr Gəncə Texnologiya Universitetinə qəbul olunub- 36 faiz. Subbakalavrların 53 faizi isə Bakı Biznes Universitetinə qəbul olub".