“Qadınlar postmünaqişə dövrünün problemlərinin həllinə aktiv cəlb olunublar”.
APA-nın məlumatına görə, bunu bu gün Beynəlxalq Münasibətlərin Təhlili Mərkəz və BMT-nin Azərbaycan Nümayəndəliyinin birgə təşkilatçılığı ilə keçirilən “Qadın, sülh və təhlükəsizlik: Postmünaqişə dövründə bərpa işlərində qadınların rolu” mövzusunda konfransda Birinci vitse-prezidentin köməkçisi Elçin Əmirbəyov bildirib.
E. Əmirbəyov deyib ki, qadınların münaqişədən sonra bərpa işlərinə lazımi töhfə verməsi üçün şərait yaradılmalıdır: “Azərbaycan hökuməti buna şərait yaratmağa hazırdır. Azərbaycan 30 illik işğala son qoymaqla Cənubi Qafqazda inkişafa imkan açan yeni geosiyasi şəraiti yaradıb”.
Birinci vitse-prezidentin köməkçisi qeyd edib ki, bu inkişaf Azərbaycan, Rusiya və Ermənistan dövlət başçılarının üçtərəfli bəyanatlarında əksini tapan məsələlərin yerinə yetirilməsindən keçir: “Azərbaycan inanır ki, Ermənistanla dinc yanaşmanın alternativi yoxdur. Azərbaycan Ermənistandan siyasətini yeni geosiyasi reallığa uyğunlaşdırmağı gözləyir”.
