Moskvadakı erməni icmasının rəhbəri, tanınmış sahibkar və ictimai xadim olduğu bildirilən Artyom Vardanyan Ermənistanın Rusiyadakı səfiri təyin edilmək üçün ölkənin baş nazirinin həyat yoldaşı Anna Akopyanın adına olan fonda hər il 500 min dollar pul köçürəcək. "Baki-Baku.az" xəbər verir ki, belə bir iddia ilə Ermənistandakı "Past" qəzeti çıxış edib.
Qəzetin yazdığına görə, Vardanyanı A.Akopyan himayə edir. Maraqlıdır ki, Akopyan iki ay əvvəl Vardanyanla görüşüb və həmin görüşdən şəkli özünün facebook səhifəsində yayımlayıb.
Vardanyan bir müddət əvvəl deyib ki, Ermənistan hakimiyyəti qərar versə, ona xidmət etməyə hazırdır. Lakin o, Akopyanla bu barədə söhbətin getdiyinə dair məlumatları təkzib edib.
"Past" qəzetinin mənbələri hakimiyyətin Vardanyanın Rusiyaya səfir təyinatında qərarlı olduğunu bildiriblər. Bu isə nəşrin iddia etdiyi 500 min dollar məsələsinin həqiqətə uyğunluğunu təsdiqləyir. Qəzet həmçinin bildirir ki, Ermənistan hakimiyyəti bu təyinatla Rusiyadakı sahibkarları öz ətrafında cəmləşdirməyə, əlində saxlamağa cəhd göstərir. Bunun Rusiya tərəfindən də anlaşıldığını diqqətə çatdıran nəşr Moskvanın Vardanyanın təyinatına necə yanaşacağının maraq doğurduğunu da vurğulayıb.
