Ermənistanın baş naziri Nikol Paşinyan hökumətin iclasında Türkiyə ilə münasibətlərin normallaşdırılması məsələsinə toxunub. "Baki-Baku.az" xəbər verir ki, bu barədə məlumatı "Armenpress" yayıb.
Məlumatda bildirilir ki, N.Paşinyan Ermənistan-Türkiyə münasibətlərinin normallaşması, Ermənistan-Türkiyə dəmir yolu və avtomobil yollarının işinin bərpası barədə danışmaq imkanını gördüyünü deyib. "Belə bir söhbətə hazırıq. Söhbət ümumiyyətlə, bölgəmizi qərbdən şərqə, şimaldan cənuba bağlayan bir qovşağa çevirməkdən gedir", - deyə Paşinyan vurğulayıb.
Baş nazir Rusiyanın bu prosesi fəal şəkildə dəstəkləməyə hazır olduğunu göstərdiyini də bildirib. “Avropa Birliyi, Fransa və ABŞ da bu prosesdə maraqlıdır. Çin və Hindistanın kommunikasiya layihələrinin inkişafına olan marağı da məlumdur”, - deyə Paşinyan əlavə edib.
Paşinyan onu da deyib ki, bölgədə sülh və sabitlik Ermənistan hökumətinin uzunmüddətli strategiyasıdır. “Və biz bu problemin həllində özümüzü məsuliyyətli hesab edirik. Sülh, sabitlik, əməkdaşlıq asanlıqla elan olunur və arzu olunan məqsədlərdir, lakin onların həyata keçirilməsi ağlabatan, düşünülmüş, praqmatik səylər tələb edir. Ermənistan belə səylər göstərməyə hazırdır", - deyə Paşinyan fikrinə aydınlıq gətirib.
