ABŞ Dövlət Departamentinin çağırışından anlaşılan: Ya ATƏT-in Minsk Qrupu, ya da Ermənistan-Azərbaycan sərhəddində gərginlik

Birləşmiş Ştatlar Azərbaycan və Ermənistanı sərhəddəki vəziyyəti gərginləşdirməmək üçün təcili addımlar atmağa çağırır. "Baki-Baku.az" xəbər verir ki, bu çağırış ABŞ Dövlət Departamentinin rəsmi nümayəndəsi Ned Praysın bəyanatında yer alıb.

N.Prays bildirib ki, ABŞ Ermənistanla Azərbaycan arasında sərhəddə son vaxtlar şiddətin artmasını pisləyir. Hər iki tərəf vəziyyətin gərginliyini aradan qaldırmaq üçün addımlar atmalı və atəşkəs öhdəliklərini yerinə yetirməlidirlər. Departament sözçüsünün bildirdiyinə görə, sərhəddə davam edən proseslər təsdiqləyir ki, iki ölkə arasındakı gərginliyi yalnız başlıca problemlərin həlli aradan qaldıra bilər. Bu xüsusda o, ATƏT-in Minsk Qrupu həmsədrlərinin missiyası üzərinə gəlib və tərəfləri həmsdərlərin himayəsi altında danışıqlara qayıtmağa çağırıb.