Azərbaycan sülhməramlıların mandatını hələ imzalamayıb. "Baki-Baku.az" "Armenpress"ə istinadən xəbər verir ki, bu fikri Ermənistanın baş naziri vəzifəsini icra edən Nikol Paşinyan hökumətin iclasındakı çıxışında dilə gətirib.
"Azərbaycan ATƏT-in Minsk qrupu həmsədrlərinin aprelin 13-də danışıqların bərpası barədə bəyanatı da daxil olmaqla beynəlxalq ictimaiyyətin münaqişənin uzunmüddətli siyasi həllinə dair bütün təkliflərinə məhəl qoymadan aqressiv ritorika və hərəkətlərdən istifadə etməyə davam edir", - deyə N.Paşinyan əlavə edib. Onun sözlərinə görə, Azərbaycan bütün hərəkətləri ilə 10 noyabr və 11 yanvar bəyanatlarını nüfuzdan salır, hər hansı dialoq fürsətini pozmağa çalışır.
N.Paşinyan onu da bildirib ki, Azərbaycanda erməni əsirlərlə bağlı məhkəmələr davam edir, onlar uzun müddətli həbs cəzalarına məhkum edilirlər. "Xüsusi diqqət çəkən məqam budur ki, əsirlərin demək olar ki, hamısı 10 noyabrdan sonra sülhməramlıların məsuliyyət zonalarında əsir götürülmüş şəxslərdir. Bu həqiqəti Azərbaycanda sülhməramlılara qarşı aparılan anti-təbliğatla və Azərbaycanın hələ də sülhməramlıların mandatına imza atmaması ilə əlaqələndirsək, bunun sülhməramlılara qarşı yönəlmiş hərəkət olduğu aydın olur. Yəni Dağlıq Qarabağdakı sabitliyə və barışa qarşı hərəkət", - deyə Paşinyan fikrinə aydınlıq gətirib.
