Azərbaycan addım-addım Qarabağın statusu məsələsini öz xeyrinə həll edir. "Baki-Baku.az" "Panorama.am"a istinadən xəbər verir ki, bu fikri özünün facebook səhifəsində Ermənistanın üçüncü prezidenti Serj Sarkisyanın rəhbərlik etdiyi Respublikaçılar Partiyası sədrinin müavini Armen Aşotyan yazıb.
Aşotyan bildirib ki, rüsvayçı kapitulyasiyadan sonra yaranmış durum nəticəsində Ermənistan dövlətçiliyinin ləğvi, təhlükəsizliyə təhdidlər, iqtisadi kollaps, ərazilərin itirilməsi reallığı yaranıb. Partiya sədri bu problemlərdən yalnız birininin üzərində dayandığını deyir - Dağlıq Qarabağın statusu. O, məsələnin 10 noyabr bəyanatına da daxil edilmədiyini vurğulayıb və əlavə edib ki, bu, Qarabağ hərəkatının və mübarizəsinin başlıca sualı idi və yekun həlli olmalıydı.
"Beynəlxalq ictimaiyyət hazırda siyasi səviyyədə Qarabağın statusu məsələsinin müvəqqəti dondurulması ideyası üzərində dayanıb", - deyən Aşotyan bildirib ki, 44 günlük müharibə Qarabağ məsələsini dondurulmuş münaqişə kontekstindən dondurulmuş status kontektinə daşıdı. Əslində elə gəlir ki, dondurulub. Faktiki olaraq Ermənistanda hakimiyyətdə olan türkmeylli qüvvələrin köməyilə Azərbaycan addım-addım Qarabağın statusu məsələsi öz xeyrinə həll edir. Partiya sədrinin müavini fikrini əsaslandırmaq üçün Artsax ordusunun gələcəyi, əraziyə erməni rəsmilərin səfərləri və ümumən Qarabağa xaricilərin səfərləri məsələlərini qabardıb. O deyib ki, Azərbaycan Qarabağın subyekt kimi varlığının hər qatını ayırmağa müvəffəq olur: "Böyük ərazilərin itirilməsindən sonra Qarabağda funksional itkilər başlayıb. Faktiki olaraq müharibə davam edir. Amma bu dədə Ermənistan müqavimət göstərmir. Çünki əclaf satqın (baş nazir Nikol Paşinyan nəzərdə tutulur) ölkə daxilində xalqa qarşı ikinci cəbhə açıb ki, biz xarici cəbhəyə köklənə bilməyək. Nə vaxtadək biz daxili türklərə dözməli olacağıq? Axı bu templə daxili və xarici türklər məsələn, Respublika meydanında görüşəcəklər".
