Şurnuxun Azərbaycan ərazisinə düşən 12 evinin sakinləri artıq ərazidən çıxıblar. "Baki-Baku.az" erməni mediasına istinadən xəbər verir ki, bunu kənd icmasının rəhbəri Akop Arşakyan deyib.
Qeyd edək ki, Ermənistanın Sünik vilayətindəki Şurnux kəndinin yarısı sərhəd bölgüsünə əsasən Azərbaycana məxsusdur. Buna görə də Azərbaycan hərbçiləri yanvarın 5-dək oranın sakinlərinə ərazini tərk etmək barədə xəbərdarlıq ediblər. Sakinlər evləri tərk ediblər. Onların bəziləri evdən çıxarkən yanğın da törədiblər.
Qeyd edək ki, 1920-ci illərdə Zəngəzurun Şurnux kəndində yalnız azərbaycanlılar yaşayırdı. Daha sonra etnik təmizliyə məruz qaldı. Ermənilər orada yaşamağa başladılar. Lakin sonrakı onilliklərdə bir çox azərbaycanlı Şurnuxa qayıtdı. 1947-ci il dekabrın 23-də Sovet İttifaqı Nazirlər Soveti 4083 saylı qərar qəbul etdi. Qərara görə, Ermənistanda yaşayan azərbaycanlılar, o cümlədən Şurnux sakinləri Azərbaycan SSR-nın Kür-Araz vadisinə yerləşdirildi. 1953-cü il Stalinin ölümündən sonra şurnuxlu türklər kəndə qayıtdılar. Azərbaycan mənbələrinə görə, 1979-cu ildə Şurnuxda 560 azərbaycanlı yaşayırdı. 1988-ci ildə onlar Şurnuxudan deportasiya edildilər.
