Qarabağ ermənilərinin Rusiya pasportu ilə təmin olunmasına dair söz-söhbətlər çoxalmaqdadır. Qarabağdakı qondarma rejimin "təhlükəsizlik şurasının" katibi, rejimin faktiki idarəedicisi Vitali Balasanyan "Arovat" qəzetinə müsahibəsində də bununla bağlı məsələyə toxunub və deyib: "Bilmirəm, bu xəbərlər hardan yaranır, ancaq istisna deyil".
Əslində Balasanyan müsahibəsində olduqca qeyri-müəyyən tərzdə danışır. O bildirir ki, Rusiyaya Dağlıq Qarabağın müstəqilliyini tanımaq təklif olunub. Balasanyan həmçinin təsəvvür formasında deyir ki, "biz əraziləri genişləndirəcəyik və Rusiya da müstəqilliyi tanıyacaq". Onun məntiqinə görə müstəqillik tanındıqdan sonra Qarabağ erməniləri Rusiya vətəndaşlığı almaq üçün müraciət edə bilərlər. "Heç nə istisna deyil. Çünki bu, xalqın qərarıdır. Biz Ermənistan Respublikasının vətəndaşlarıyıq və onun hüdudlarından kənarda yaşayırıq. Biz Ermənistanın beynəlxalq hüquqla tanınmış sərhədlərindən kənarda yaşayırıq, ancaq Ermənistan parportu daşıyırıq. Təkrar edirəm, bu, (yəni Rusiya pasportlarının verilməsi) istisna deyil".
