Ermənistanın özü belə Dağlıq Qarabağın müstəqilliyini tanımayıb.
APA-nın Moskva müxbirinin məlumatına görə, bu barədə Rusiya Prezidenti Vladimir Putin bu gün keçirilən ənənəvi illik mətbuat konfransında bildirib. O qeyd edib ki, ətraf rayonlar, habelə Dağlıq Qarabağ beynəlxalq hüquqa görə Azərbaycan ərazisidir.
“Dağlıq Qarabağda müharibənin kənardan müdaxilə nəticəsində baş verdiyini düşünmürəm”, - deyən V.Putin Dağlıq Qarabağda müharibənin niyə məhz indi baş verməsi barədə suala cavabında bildirib. O, münaqişə zonasında indiyə kimi də hərbi toqquşmaların baş verdiyini xatırladıb: “Vəziyyət nəzarət altından çıxdı. Gərginlik uzun illərdir davam edirdi. Bu, kənardan müdaxilə nəticəsində baş verməyib”.
Rusiya prezidenti digər ölkələrin və beynəlxalq təşkilatların sözdən işə keçəcəyinə və Qarabağ məsələsinə kömək etməyə başlayacağına ümid etdiyini bildirib.
10 noyabr sazişindən sonra Qarabağda atəşkəsin bir dəfə pozulduğunu deyən Rusiya prezidenti bu halın təkrarlanmayacağına ümidvar olduğunu vurğulayıb.
