- Daxili siyasət
- 09:33 20.09.2024
Ermənistanın baş naziri Nikol Paşinyan Müstəqil Dövlətlər Birliyi (MDB) Dövlət Başçıları Şurasının oktyabrın 13-də Qırğızıstanın paytaxtı Bişkekdə keçiriləcək iclasında iştirak etməyəcək. Bu barədə N.Paşinyan oktyabrın 10-da Qırğızıstan Prezidenti Sadır Japarovla telefon danışığı zamanı məlumat verib. Qırğız liderin mətbuat xidmətinin yaydığı məlumatda qeyd edilib ki, N.Paşinyan telefon danışığı zamanı təəssüflə bir sıra səbəblərdən sammitdə iştirak edə bilməyəcəyini bildirib.
Həmin “bir sıra səbəblərin” nələrdən ibarət olduğu isə açıqlanmayıb. Ancaq hazırda Ermənistanda hökm sürən anti-Rusiya, rusofob əhval-ruhiyyə fonunda hayların baş nazirinin Bişkekə hansı səbəbdən getmədiyini təxmin etmək çətin deyil.
Ermənistan mediasında səfərin baş tutmamasından bəhs edən yazıları oxuduqda da bu nəticəyə gəlmək olur ki, Paşinyan bununla Azərbaycanın sentyabrın 19-20-də Qarabağ iqtisadi rayonunun ermənilər yaşayan hissəsində keçirdiyi lokal xarakterli antiterror tədbirlərinə Rusiyanın münasibətindən narazılığını ifadə edir. Erməni baş nazir daha Rusiya ilə əməkdaşlığı davam etdirmək istəmir, getdikcə onunla məsafə saxlamağa çalışır.
Bu mövzuda “Armenian Report” saytında yerləşdirilən məqalə diqqəti cəlb edir. “Paşinyan Putinə və MDB-yə dirsək göstərdi” sərlövhəli məqalədə deyilir: “İki stulda oturmağa cəhd etməkdən əl çəkməyin vaxtı gəlib çatdı. Xüsusilə, stullardan birinin ayağı sındığı üçün… Qərb strukturları ilə inteqrasiya istiqamətində aydın kurs götürməyin vaxtıdır. “Xalqlar arasında dostluğun etibarlı qalası” başa çatmaq üzrədir. Daha doğrusu, Ermənistanın bu “qala” ilə “dostluğu”. Və burada kimin kimi tərk etməsi ilə bağlı heç bir açıq bəhanə yoxdur. Bu, KTMT ilə bağlı baş verənlərə bənzəyir. Paşinyan KTMT-yə münasibətdə heç vaxt izah edə bilmədi ki, biz “Putinin NATO-su”ndan gedirik, yoxsa o, bizi tərk edir. Xeyr, bu dəfə hər şey aydından daha aydındır”.
Məqalədə qeyd olunur ki, Rusiya və MDB ölkələrinin iştirakı ilə əsas toplantılar oktyabrın 12-13-də Bişkekdə planlaşdırılıb. Əvvəlcə, yəni ayın 12-də MDB ölkələrinin Xarici İşlər Nazirləri Şurasının, 13-də isə MDB Dövlət Başçıları Şurasının iclası olmalıdır: “Gözlənildiyi kimi, bunlarda Ermənistan da iştirak etməli idi. Amma əvvəlcə Ararat Mirzoyanın Bişkekə getməyəcəyi açıqlandı. Oktyabrın 10-da isə baş nazir Paşinyanın da getməyəcəyi məlum oldu. Ölkəmiz yalnız xarici işlər nazirinin müavini səviyyəsində təmsil olunacaq. Ermənistanın Kremlin kurasiya etdiyi tədbirdə iştirakının səviyyəsini bu dərəcədə aşağı salması Rusiyaya qarşı açıq-aşkar demarşdır. Nəzərə alsaq ki, İrəvan hələ də respublikanın KTMT-də daimi nümayəndəsi vəzifəsinə namizəd irəli sürməyib. KTMT Putinin daha bir sevimli “övladı”dır”. Şübhəsiz ki, İrəvanın bu istiqamətdə apardığı siyasət nəinki Rusiyanın hərəkətlərindən məyus olan, həm də Moskvanın erməni dövlətinə xəyanət etdiyini anlayan Ermənistan ictimaiyyətinin əksəriyyətinin rəğbətini qazanacaq”.
Sayt qeyd edir ki, bu mənada rusların təşkil etdiyi MDB tədbirlərində Paşinyanın və Mirzoyanın iştirakı tamamilə lazımsızdır: “Biz orada nə itirmişik? MDB ölkələri Ermənistana və “Artsaxa” dəstək ifadə etməkdən belə çəkindilər. Üstəlik, 120 min insanın (?), o cümlədən 30 min uşağın yaşadığı 9 aylıq blokada (?) nəticəsində “real humanitar fəlakətə” baxmayaraq, postsovet məkanında heç kim “Artsax xalqı”na heç bir yardım göstərmədi. Coğrafi baxımdan bizdən uzaq ölkələr – Fransa, ABŞ, Kanada, Hindistan diqqət və qayğı göstərsələr də, postsovet düşərgəsindəki qonşularımız kar, lal və kor oldular. Hətta, dərman və qida da göndərmədilər. Bütün MDB ölkələri “erməni faciəsinin” laqeyd seyrçisinə çevrilib. Hərçənd ki, yox, səhv edirəm. Onlar laqeyd deyildilər. Onların bir çoxu Azərbaycanın adına sevinir, hətta, bəlkə də ərazi bütövlüyünün bərpası münasibətilə Bakını qeyri-publik şəkildə təbrik edirdilər. Qazaxlar, özbəklər, qırğızlar, belaruslar mütləq təbrik ediblər. İndi belə bir qeyri-dost reaksiya fonunda bizim təmsilçilərimiz MDB sabantuyu (sabantuy tatar, başqırd, çuvaş və bəzi digər türk xalqlarının hər il qeyd etdikləri milli bayramdır – S.H.) üçün Bişkekə getməli idilər? Yox! İrəvanda tamamilə düzgün qərar verdilər”.
“Armenian Report” daha sonra yazır: “İndi isə başqa sual yaranır. Bizim hakimiyyət nə vaxt yetkinləşəcək ki, Ermənistanın MDB-dən de-yure çıxması təşəbbüsü ilə çıxış etsin? Məsələn, Moskvanın hərəkətlərindən böyük zərər çəkən Ermənistan kimi Moldova artıq MDB çərçivəsində silahlı qüvvələr və sərhəd qoşunları, eləcə də strateji təyinatlı silahlı qüvvələr haqqında sazişlərdən çıxır. Moldova haqlı olaraq bunu edir. Silahlı qüvvələrinizi özünüz idarə etməlisiniz və sonra öz barmağınızı dişləməmək üçün onu Rusiyanın nəzarəti altına verməməlisiniz. Bizim də Ermənistan–Rusiya Birgə Qoşunlar Qrupu ilə bağlı müqavilələrimiz var. Həmin müqavilələr 2021 və 2022-ci illərdə bizə çox kömək etdilər? Gümrüdəki Rusiya hərbi bazası bizə çox kömək etdi? Ümumiyyətlə, həmin baza orada nə üçündür? Ermənistanın, yoxsa Rusiyanın maraqlarını qorumaq üçün? Cavab aydındır”.
Qeyd olunur ki, bütün bunlara görə həm MDB-dən, həm KTMT-dən, həm də Avrasiya İqtisadi İttifaqından çıxmağın vaxtı çatıb: “Bu ölü doğulmuş təşkilatlara üzvlük Ermənistan dövlətinə yaxşı heç nə verməyib. Əksinə, xüsusilə KTMT-yə üzvlük NATO ilə, ümumiyyətlə, Qərblə hərbi-texniki əməkdaşlıq baxımından əl-qolumuzu bağlayır. İndi isə bizim üçün son dərəcə vacibdir ki, rusların əlinə keçəcəyindən qorxaraq heç kimin bizə vermədiyi Qərb silahlarının köməyi ilə dövlətin müdafiə qabiliyyətini gücləndirək. Buna görə də, iki stulda oturmağa cəhd etməməyin vaxtı gəlib çatıb, xüsusən də stullardan birinin ayağı sındığı üçün... Qərb strukturlarına inteqrasiya istiqamətində aydın kurs götürməyin vaxtı çatıb. Bizim gələcəyimiz oradadır. Paşinyan isə MDB-yə qarşı demarşı ilə hər şeyi düzgün etdi. O, Ermənistanı ölkəmizin bütün düşmənlərinin toplaşdığı bu absurd birlikdən çıxarsa, xalqın daha böyük rəğbətini qazanacaq. Görünür, son hadisələr fonunda o gün uzaqda deyil”.
Onu da qeyd edək ki, Ermənistan diplomatiyası nümayəndələrinin hansısa “bir sıra səbəblər” üzündən beynəlxalq tədbirlərə qatılmaması ilk dəfə deyil. Belə ki, bu ilin martında Ermənistanın “Civilnet” informasiya portalı Ararat Mirzoyanın 2022-ci ilin dekabrında rusiyalı və azərbaycanlı həmkarları Sergey Lavrov və Ceyhun Bayramovla görüşdənsə, ipoteka ilə mənzil almağa üstünlük verdiyini yazmışdı. Paşinyan isə mətbuat konfransında jurnalistləri inandırmağa çalışmışdı ki, Mirzoyan Laçın yolunun bağlanması (?) ilə bağlı yaranmış obyektiv şəraitə görə görüşə getməyib. Amma sonra məlum olmuşdu ki, Mirzoyan həmin gün ipoteka müqaviləsi imzalayıb. Sazişin bağlanma tarixi 2022-ci il dekabrın 23-də, yəni xarici işlər nazirlərinin Moskvada görüşünün keçirildiyi gündə baş verib.
İndi də Paşinyan hansısa “bir sıra səbəbləri” əsas gətirir. Ancaq onun uzaq Qranadada keçirilən Avropa Siyasi Birliyinin sammitinə qatıldığı halda, yaxın Bişkekdə baş tutacaq MDB Dövlət Başçıları Şurasının iclasına getməməsi gözdən pərdə asmaq üçün edilən uğursuz cəhddir.
Fərid ŞƏFİYEV,
Beynəlxalq Münasibətlərin Təhlili Mərkəzi İdarə Heyətinin sədri
– Bilirsiniz, Ermənistan indi Qərbə göstərmək istəyir ki, istiqaməti onlara doğrudur. Onlarla əməkdaşlığı inkişaf etdiməyə çalışır. Həmçinin, Ermənistan rəhbərliyi hazırda ruslardan incikdir. Halbuki, Paşinyan oktyabrın 10-da Ermənistanın İctimai Televiziyasına müsahibəsində qeyd edib ki, Rusiyanın hərbi bazası Gümrüdə qalır və KTMT ilə bağlı İrəvan tərəfindən hər hansı ciddi addım atılmayacaq. Bu, onların ruslara verdikləri strateji mesajdır ki, biz sizinlə bir yerdə qalırıq, amma sizdən narazıyıq. Narazılığı də müxtəlif formada ifadə edirlər.
Digər tərəfdən, hazırda sülh danışıqlarının yeni mərhələsi başlanmalı, növbəti görüş keçirilməlidir. Ermənistan növbəti görüşlərin Qərb platformasında keçirilməsini istəyir. Orada Fransanın və digər ölkənin dəstəyini alıblar. Fikirləşirlər ki, danışıqlar bu formatda getsə onlar öz niyyətlərinə nail olacaqlar. Amma Azərbaycan Prezidenti oktyabrın 8-də bəyan edib ki, Gürcüstanda da görüş keçirilə bilər. Ən əsası isə bizə heç bir vasitəçi lazım deyil. Artıq ikitərəfli formatda da görüşün keçirilməsi mümkündür. Fiziki yaxınlıq səbəbindən görüşün Gürcüstanda keçirilməsi daha məqbuldur. Amma vasitəçisiz. Bunu da ermənilər hələ müsbət cavablandırmayıblar. Söhbət ondan gedir ki, onlar həmişə kiminsə kənardan gəlib onların problemlərini həll etməyini gözləyirlər. Onların bütün siyasəti bundan ibarətdir. Bu, əvvəllər Rusiya idi. Otuz il ərzində Rusiyanın Cənubi Qafqazda güclənməsinə, hərbi, iqtisadi cəhətdən mövcudluğuna xidmət edən ölkə Ermənistan idi.
İndi isə Qərbdə yeni mif yaradırlar. Guya ki, onlar Qərblə əməkdaşlıq etmək istəyirlər, Azərbaycan isə Rusiya ilə birləşərək, yaxud rus sülhməramlılarının seyrçi nəzərləri altında Qarabağa hücum edib. Beləliklə də bizi ruslarla bağlayırlar.
Fərhad MƏMMƏDOV,
Cənubi Qafqaz Tədqiqatlar Mərkəzinin direktoru
– Paşinyanın bu addımları gözə kül üfürməyə bənzəyir. Çünki MDB Sammitinə getməmək MDB-dən, KTMT-dəki Ermənistan nümayəndəsini geri çağırmaq həmin qurumdan çıxmaq demək deyil. Roma statutunu ratifikasiya etmək və paralel olaraq bundan irəli gələn Rusiya Prezidenti ilə bağlı həbs-qətimkan tədbirini inkar etmək də yarımçıq addımdır. Yəni, Paşinyan Qərbin dəstəyini almaq üçün və düşünürəm ki, Fransanın məsləhəti ilə maksimum bacardığını həyata keçirir. Lakin tam addımlar atmır.
Ermənistan-Rusiya münasibətlərinin hazırkı durumunu səciyyələndirəsi olsaq, deməliyik ki, bunlar elə əvvəlki münasibətlərdir. Onlar hərbi-siyasi müttəfiqlərdir. Rusiyanın orada hərbi hissəsi var. Ermənistan Rusiyanın iqtisadi-ticari tərəfdaşıdır. Ticarət dövriyyəsinin həcmi inanılmaz dərəcədə artmaqdadır. Ermənistan Avrasiya İqtisadi İttifaqının, KTMT-nin və Gömrük İttifaqının tamhüquqlu üzvüdür. İndiki yarımçıq addımlar isə ancaq informasiya kontekstində maraq doğurur. Həmin yarımçıq addımların sabun köpüyü kimi formalaşdığı, ancaq bazisinin olmadığı görünür. Bu da böyük ehtimalla Qərbin irəli sürdüyü tələblərə cavab olaraq, Fransanın məsləhəti ilə həyata keçirilən informasiya-təbliğat kampaniyasıdır.
Səxavət HƏMİD