Azərbaycan yenə dünyaya nümunə göstərdi

Azərbaycan Ordusu hərb tariximizə daha bir şərəfli səhifə yazdı. Ordumuzun sentyabrın 19-da günorta saatlarında başlayan və bir sutkadan az davam edən lokal xarakterli antiterror tədbirlərini yüksək peşəkarlıqla yerinə yetirməsi belə deməyə əsas verir. Bu tədbirlər zamanı Ermənistan silahlı qüvvələrinin birləşmələrinin ön xətt və dərinlikdə olan mövqeləri və uzunmüddətli atəş nöqtələri, eləcə də döyüş vasitələri və hərbi təyinatlı obyektləri yüksək dəqiqlikli silahların tətbiqi ilə sıradan çıxarıldı.

Lokal xarakterli antiterror tədbirlə­rinin uğurlu olması Prezident İlham Əli­yev tərəfindən də qiymətləndirildi. Dövlət başçımız sentyabrın 20-də xalqa mü­raciətində bu barədə dedi: “Qeyd etmə­liyəm ki, antiterror tədbirləri nəticəsində bizim hərbçilərimiz böyük qəhrəmanlıq, şücaət, peşəkarlıq göstərmişlər. Ağır rel­yef şəraitində, düşmən tərəfindən uzun illər böyük mühəndislik işləri nəticəsində istehkamların mövcudluğu şəraitində, düşmən mövqelərinin təpələrdə, əlverişli yerlərdə yerləşdirilməsinə baxmayaraq, bizim hərbçilərimiz bir daha qeyd etdiyim kimi, qəhrəmanlıq, peşəkarlıq göstər­mişlər və qısa müddət ərzində bütün istiqamətlər üzrə əhəmiyyətli dərəcədə hərbi uğurlar əldə etmişlər. Ermənistan dövlətinin Azərbaycan ərazisində qanun­suz yerləşdirilmiş və Ermənistan dövləti­nin öhdəliyinə baxmayaraq, bu günə qə­dər çıxarılmamış ordunun böyük hissəsi tamamilə məhv edilmişdir. Hərbi texnika məhv edilmişdir və sıradan çıxarılmışdır”.

Beləliklə, ordumuzun yüksək peşə­karlığına dostlarımız da, düşmənlərimiz də bir daha şahid oldular. Dostlarımız sevindilər, düşmənlərimiz kədərləndilər. Əminliklə demək olar ki, antiterror təd­birlərinin peşəkarlıqla həyata keçirilməsi nəticəsində ölkəmizin qarşısına qoyduğu strateji hədəflərə tam nail olundu. Qon­darma separatçı rejimin bir sutka ərzində ağ bayraq qaldırması da, əslində, tədbir­lərin uğurlu olmasının təsdiqidir.

Ümumiyyətlə, qondarma rejim, onu yaradan və 30 ildən artıq himayə edən Ermənistan Azərbaycan Ordusunun gücünü ilk dəfə hələ 2016-cı ilin Aprel döyüşləri zamanı görmüşdülər. Aprel döyüşləri bizim gələcək qələbələrimizin müjdəsi idi. Ondan iki il sonra – 2018-ci ilin mayında Günnüt əməliyyatı keçirildi. Bu əməliyyat Aprel döyüşlərindən sonra növbəti ən böyük uğurumuz oldu.

Həmin əməliyyat bir sıra yüksəklik­lərin, ərazilərin azad olunması baxımın­dan əhəmiyyətli idi. Belə ki, Azərbaycan Ordusu yeddi gün ərzində Şərur rayonu­nun Günnüt kəndi, Ağbulaq yüksəkliyi, Qızılqaya, Qaraqaya dağlarını azad etdi. Bundan başqa, Dərələyəz mahalının Arpa kəndinin bir sıra mühüm strateji əra­zilərinə nəzarət sayəsində gələcək əmə­liyyatlara ciddi töhfə vermiş oldu. Qısa müddət ərzində 11 min hektar ərazinin azad olunması düşmənə ciddi mənə­vi-psixoloji təsir göstərdi. Çünki Azərbay­can Ordusu bu ərazilərdən İrəvan-Yexeq­nadzor-Gorus-Laçın-Xankəndi avtomobil yoluna nəzarət etməyə müvəffəq oldu. Məhz bu nəzarət 44 günlük Vətən mü­haribəsində düşmənin Naxçıvan Muxtar Respublikası istiqamətində təxribat törət­məsinə imkan vermədi. Çünki düşmən fərqində idi ki, belə olacağı təqdirdə, tam şəkildə mühasirəyə düşəcək.

Ümumilikdə, həm Aprel döyüşləri, həm də Günnüt əməliyyatı Azərbaycan Ordusunun peşəkarlığını, döyüş əzmini göstərdi. İstər Aprel döyüşləri, istərsə də Günnüt əməliyyatı Vətən müharibəsində­ki Zəfərimizə ciddi töhfə verdi.

2020-ci ilin sentyabrın 27-də başla­nan Vətən müharibəsi isə 30 ilə yaxın işğal altında qalan torpaqlarımızın azad olunması ilə nəticələndi. Cəmi 44 gündən sonra Ermənistan ağ bayraq qaldıraraq təslimolma aktını imzaladı.

Bu il sentyabrın 19-da başlayıb 20-də bitən lokal xarakterli antiterror tədbirləri nəticəsində isə Azərbaycan özünün bey­nəlxalq birlik tərəfindən tanınan torpaq­ları üzərində hakimiyyətini tam bərqərar etdi.

***

Lokal miqyaslı antiterror tədbirləri­nin hərbi planda uğuru ilə yanaşı, digər məqamları da qeyd etmək lazımdır. Bu­rada da, ilk növbədə, yaşayış məntəqələ­rinə hərbi vasitələrlə – tanklarla, toplarla daxil olmamağımızı vurğulamaq olar. Nəticədə, dinc insanlar arasında itkilər olmadı. Həmçinin mülki obyektlər ziyan görmədi. Tədbirlər çərçivəsində yalnız le­gitim hərbi obyektlər və hərbi infrastruktur dəqiq silahlarla hədəfə alınaraq siradan çıxarıldı. Kommunikasiyalar və yüksək­liklər nəzarətə götürüldü.

Bu antiterror tədbirləri mülki əhalinin, demək olar ki, zərər görməməsinə dair çox nadir nümunədir. Hətta BMT-nin bu sayaq tədbirlərində belə mülki insanlar arasında itkilər olur. Ermənistan silahlı qüvvələrinin birləşmələri tərəfindən atəş vasitələrinin yaşayış yerlərinin yaxınlığın­da yerləşdirilməsini nəzərə alaraq, Azər­baycan Müdafiə Nazirliyi ərazidə olan mülki əhalini hərbi obyektlərdən kənar durmağa və Ermənistan silahlı qüvvələri­nin birləşmələrinə dəstək olmamağa ça­ğırış etdi. Bu barədə mobil SMS xidməti vasitəsilə Azərbaycanın Qarabağ bölgə­sinin erməni sakinlərinə məlumat gön­dərildi. Eyni zamanda, səsgücləndirici texniki vasitələrlə əhali xəbərdar edildi və məlumat vərəqələri paylanıldı. Mü­dafiə Nazirliyinin açıqlamasında o da qeyd olundu ki, qadınlar, uşaqlar, qoca­lar, habelə fiziki məhdudiyyətli şəxslər və xəstələrə lazımi tibbi və digər yardımlar göstəriləcək, onlar içməli su və ərzaqla təmin olunacaq. Əhalinin təhlükəli ərazi­dən təxliyyəsini təmin etmək üçün Laçın yolu üzərində və digər istiqamətlərdə hu­manitar dəhliz və qəbul məntəqələrinin yaradılması da görülən tədbirlər sırasın­da idi.

Eyni zamanda, Azərbaycan qanunla­rına və beynəlxalq humanitar hüquq nor­malarına uyğun olaraq, təhlükəsizliyinə zəmanət verilən inzibati, sosial, təhsil, tibbi, dini və digər obyektlərin mühafizə və müdafiəsi təşkil olundu. Onlara xətər yetirilmədi.

Beləliklə, Azərbaycan bu məsələ­də də nümunə göstərdi. Bu isə yenə də bilavasitə Prezident İlham Əliyevin tap­şırıqlarının icrasının nəticəsidir. Dövlət başçımız xalqa müraciətində bununla bağlı bildirib: “Əməliyyat başlamazdan əvvəl mənim tərəfimdən bütün hərbi birləşmələrimizə bir daha ciddi tapşırıq verilmişdir ki, aparılan antiterror tədbir­ləri nəticəsində Qarabağ bölgəsində yaşayan erməni əhalisi zərbə altına düş­məməlidir və mülki əhali qorunmalıdır. Biz həm yüksək dəqiqliyə malik silahlar­dan istifadə edərək buna nail olduq, eyni zamanda, Silahlı Qüvvələrimizin peşə­karlığı nəticəsində mülki vətəndaşlar ta­mamilə özlərini sığortalanmış vəziyyətdə hiss etmişlər. Eyni zamanda, göstəriş verilmişdir ki, mülki infrastruktura da heç bir zərbə dəyməməlidir, ancaq hərbi inf­rastruktur sıradan çıxarılmalıdır. Bir daha demək istəyirəm ki, ordumuzun, bütün Silahlı Qüvvələrimizin peşəkarlığı, texniki imkanları bizə bu vəzifəni şərəflə yerinə yetirməyə şərait yaratmışdır və bir daha Azərbaycan əsgəri, zabiti həm yüksək peşəkarlıq, həm də yüksək mənəvi key­fiyyətlər göstərmişdir”.

Beləliklə, Azərbaycan rəhbərliyi ölkə­mizi müxtəlif məsələlərdə ittiham edən­lərə heç bir bəhanə vermədi. Əlbəttə, bəzi dairələr lokal miqyaslı antiterror tədbirləri zamanı hansısa xoşagəlməz halların baş verməsini çox istəyərdilər. Onlar, məsələn, uşaqların, yaşlı insanla­rın ölümü kimi hallardan çox “məharətlə” yararlanmağı bacarırlar. Azərbaycanın öz ərazisində lokal xarakterli antiter­ror tədbirlərini bir sutka ərzində yüksək peşəkarlıqla həyata keçirməsi xüsusilə BMT Təhlükəsizlik Şurasının Qarabağla bağlı 21 sentyabr tarixli iclası ərəfəsində anti-azərbaycançı dairələrin xəbis niyyət­lərini gözlərində qoymuş oldu.

Zaur MƏMMƏDOV,
Bakı Politoloqlar Klubunun sədri

– Azərbaycanın bir sutka ərzində böyük hədəflərə nail olmasının şahidi olduq. Bu, Ali Baş Komandan, Prezi­dent İlham Əliyevin uzaqgörənliyinin və Azərbaycan Ordusunun yüksək peşə­karlığının nəticəsidir. Daha öncə razı­lığa gəlmək istəməyən, Azərbaycanın sosial-iqtisadi, hüquqi sisteminə rein­teqrasiya etməkdən yayınan, qanunsuz hərbi birləşmələrin bölgədən çıxarılma­yacağını bildirən, onu “müdafiə ordusu” adlandıran separatçı xunta rejimi “dəmir yumruğ”un gücünü bir daha gördü. Nə­ticədə, müqavimət göstərməyin mənası olduğunu başa düşərək təslim oldular, ağ bayraq qaldırdılar.

Bu, günümüzün reallığıdır. Bu real­lığı ərsəyə gətirmək asan olmadı. Er­mənistan öz yaxın müttəfiqləri ilə birgə ölkəmizə qarşı çirkin planlar hazırla­yırdı. Ayrı-ayrı beynəlxalq və regional oyunçuların bölgə ilə bağlı planları var idi. Lakin rəsmi Bakı apardığı müdrik siyasətlə bütün bu planları alt-üst etdi və sübut elədi ki, Azərbaycanla hesab­laşmaq lazımdır. Azərbaycan suveren­lik, ərazi bütövlüyü məsələsində heç kəsə güzəştə getmək fikrində deyil.

Azərbaycan Qarabağ iqtisadi rayo­nunda yaşayan erməni əsilli vətəndaş­larını qoruyacaq, onların konstitusion hüquqlarını bərpa edəcək və separatçı xunta rejiminin girovluğundan qurta­racaq. Bu, eyni zamanda, Qarabağ ermənilərinin yeni həyata başlaması üçün bir şansdır. Azərbaycan lokal an­titerror tədbirləri nəticəsində stateji hə­dəflərə nail oldu, öz əraziləri üzərində suverenliyini tam bərqərar etdi.

Məsələ Azərbaycanın tamamilə daxili işidir və heç bir kənar qüvvə bu kövrək sülh prosesinə müdaxilə et­məməlidir, qərəzli bəyanatlardan çə­kinməlidir. İftira və böhtanların da bir həddi olmalıdır. Onlar bu addımlardan çəkinməlidirlər ki, Azərbaycanın mü­vafiq qurumları mülki əhali ilə birgə gələcək quruculuq işlərini planlaşdırıb həyata keçirə bilsin. Zənnimcə, Cə­nubi Qafqazda sülh istəyən, o cüm­lədən özünü ermənilərin yaxşı yaşa­masının tərəfdarı kimi təqdim etməyə çalışanlar da baş verənlərdən nəticə çıxarmalıdırlar.

H.SƏXAVƏT