Bərdədə, bir qrup ictimaiyyətçi qadınla müharibənin ağrı acısını yaşayan insanlarımızın - yaşlının, qadının, uşağın yanındayıq. Öz vətənində isti yuvasını tərk etmək məcburiyyətində qalan insana təsəlli vermək çətindir. Amma cəbhə bölgəsindəki müşahidəm düşüncəmin yönünü bir qədər dəyişdi. Görüşdüyüm, tanıdığım insanlar hünərləri, əzmləri, mərdliyi ilə cinsindən, yaşından asılı olmayaraq hərəsi bir cəngavər, hərəsi bir döyüşçüdür. Ali Baş Komandanımın torpaqlarımızı işğaldan azad etmək əzmi və ordumun döyüş əzmi nə qədər yüksəkdirsə, xalqımın qələbə əzmi, zəfər əzmi də o qədər yüksəkdədir! Bunları gözdən qaçırmaq, görməmək, duymamaq mümkün deyil!
1988-ci ildən başlayan və bu günə qədər öz aktuallığını qoruyan gerçəklik bu ki, erməni terrorçularının dinc əhaliyə istiqamətləndirdiyi hərbi təcavüz öz torpağımızda bu gün də davam edir. Bu gün düşmən daha da azğın bir formada savaş olmayan, Qarabağ ərazisinə aidiyyatı olmayan torpaqlarımızı hədəfləyir: Gəncə, Xızı, Abşeron, Bərdə, Ağcabədi, Mingəçevir,.. Amma bu hədəf də bizi hədəfimizdən yayındıra bilməz. Cəbhə xəttinin hər qarışında od-alovla üzbəüz, məğrurcasına dayanan sakinlərin əzəməti insanı heyrətləndirir. Bu insanlar hər şeyə rəğmən 30 ilə qədər işğal altında qalan torpaqların bir an öncə düşmən tapdağından azad olunmasını gözləyir, inanır! Ali Baş Komandan İlham Əliyevə, polad iradəli sərkərdənin uğurlu döyüş strategiyasına güvənir və dəstəkləyirlər. Bir sözlə eyni amalla birləşən milyonlarla ürək zəfər həyəcanını yaşayır. Tariximizdə yeni bir səhifə açılır - ZƏFƏR səhifəsi! Zəfərin mübarək Azərbaycan!
Mətanət Ağamirova
