Fövqəladə Hallar Nazirliyinin (FHN) Mülki müdafiə qoşunlarının “N” saylı hərbi hissəsində gənc əsgərlərin andiçmə mərasimi keçirilib.
Əvvəlcə Azərbaycan Respublikasının Dövlət Himni səsləndirilib.
Sonra çıxış edənlər Mülki müdafiə qoşunlarının sıralarına daxil olan gənc əsgərlərin andiçmə mərasiminin Azərbaycan xalqının xilaskarı, müasir dövlətimizin qurucusu Ümummilli Lider Heydər Əliyevin 100 illik yubileyinə təsadüf etməsi ilə əlamətdar olduğunu vurğulayıblar. Bildirilib ki, Ulu Öndərin layiqli davamçısı Prezident, Müzəffər Ali Baş Komandan İlham Əliyevin müdrik rəhbərliyi ilə şanlı Ordumuz Ermənistan tərəfindən 30 ilə yaxın müddətdə işğal altında saxlanılan əzəli torpaqlarımızı cəmi 44 günə işğaldan azad etdi, ərazi bütövlüyümüz bərpa olundu. Hazırda işğaldan azad olunan torpaqlarımızda geniş quruculuq işləri uğurla davam etdirilir.
Qeyd olunub ki, Mülki müdafiə qoşunlarının şəxsi heyəti nəinki ölkəmizdə, eləcə də ölkəmizin sərhədlərindən kənarda baş verən təbii fəlakətlərin nəticələrinin aradan qaldırılmasında fədakarlıqla xidmət göstərirlər.
Tədbirdə çıxış edən gənc əsgər Yusif Hüseynov hərbçi yoldaşları adından əsgəri borcu şərəflə yerinə yetirəcəklərinə, baş verə biləcək fövqəladə hallar zamanı zərərçəkən insanların xilas edilməsi üçün əllərindən gələni əsirgəməyəcəklərinə, verilən tapşırıqları vaxtında və dəqiq yerinə yetirəcəklərinə, Vətənə və dövlətə sədaqətlə xidmət edəcəklərinə söz verib.
Valideyn Azər İsmayilov çıxışında bu günün valideynlər üçün çox qürurlu olduğunu qeyd edərək, bütün komandir heyətinə, övladlarının Vətənə layiqli xidmət göstərməsi üçün hazırlanmasında zəhməti olan hər kəsə minnətdarlığını bildirib.
Hərbi andı qəbul edən gənc əsgərlər ölkəmizin suverenliyini, ərazi bütövlüyünü, müstəqilliyini qanları və canları bahasına qoruyacaqlarına, Vətənimizə, xalqımıza layiqli əsgər olacaqlarına and içiblər.
Mərasim şəxsi heyətin təntənəli marşla tribuna önündən keçidi ilə başa çatıb.
