- İqtisadiyyat
- 12:15 18.04.2024
“Məmurların, o cümlədən tanınmış ictimai-siyasi xadimlərin jurnalistlərlə problemlərini məhkəmə müstəvisində həll etməyə çalışması mənfi presedentdir. Analoji hallar jurnalistlərin əl-qolunu bağlayır, mətbuatı çərçivəyə salır. Üstəlik, Azərbaycanın beynəlxalq imicinə zərbə vurur, adımızın “qara siyahı”lara düşməsinə səbəb olur”
Baki-Baku.az xəbər verir ki, bu sözləri Aznews.az-a Yenisabah.az saytının baş redaktoru Seymur Verdizadə deyib. O, qeyd edib ki, bu cür anlaşılmazlıqların məhkəmə müstəvisində deyil, Azərbaycan Mətbuat Şurasında çözülməsinin tərəfdarıdır: “Məhkəməyə qədər başqa vasitələr var. Bu vasitələrdən istifadə etməyib jurnalisti məhkəmə salonlarına sürümək xoşniyyətli yanaşma deyil”. Baş redaktor onu da vurğulayıb ki, jurnalist olmaq heç kimə toxunulmazlıq hüququ qazandırmır: “Burada incə bir məqam da var: Gərək jurnalist də etik çərçivələri aşmasın, sözü qənbər daşı kimi rəqibin başına çırpmasın. Jurnalist peşə kodeksinə əməl etməyə borcludur”.