“Azərbaycan Televiziya və Radio Verilişləri” QSC-nin (Aztv) cəbhəboyu zonaya ezam olunmuş əməkdaşı 1982-ci il təvəllüdlü Həsənov Anar Bəybala oğlu (Anar Şuşalı) yaralanıb. "Baki-Baku.az" Baş Prokurorluğun mətbuat xidmətinə istinadən xəbər verir ki, hadisə bu gün saat 15 radələrində Ağdam rayonunun Bənövşələr qəsəbəsində baş verib.
Ərazidə olan jurnalist Ermənistanın mülki əhaliyə qarşı törətdiyi təxribatları işıqlandırırdı. O, düşmən tərəfindən açılmış atəş nəticəsində müxtəlif dərəcəli bədən xəsarətləri alaraq xəstəxanaya yerləşdirilib.
“Kəndə indicə çatmışdıq ki, mərmi yaxınlıqdakı evə düşdü. Mərminin qəlpəsindən mən də yaralandım. Yanımızdakı evdən bir qadın səsi gəldi. Qapını açıb evə girdim. Gördüm yaşlı qadın yaralı halda uzanıb, amma yaşayır. Onu çıxarıb maşına gətirdim. Ərazidən çıxdıq. Onu xəstəxanaya çatdırdıq. Elə getdiyimiz xəstəxanada mənə də tibbi yardım göstərildi”. A.Şuşalının bu fikirlərini AZTV yayıb.
