“Türkiyə ilə Azərbaycanın hər sahədə olduğu kimi, media orqanları arasında da çox yaxın əlaqələri var. Bunu biz sistemləşdirmək və strukturlaşdırmaq istəyirik”. Bu fikirləri “Baki-Baku.az”a eksklüziv açıqlamasında Türkiyənin Azərbaycandakı fövqəladə və səlahiyyətli səfiri cənab Erkan Özoral deyib.
Qeyd edək ki, bir müddət öncə Azərbaycan Prezidentinin köməkçisi, Prezident Administrasiyasının xarici əlaqələr şöbəsinin müdiri Hikmət Hacıyevin başçılıq etdiyi nümayəndə heyətinin İstanbula səfəri zamanı Türkiyə-Azərbaycan Media Platformasının yaradılmasını zəruriliyi vurğulandı, mövcud istiqamətdə müzakirələr aparıldı.
Məsələni şərh edən E.Özaral ideyanın hər iki ölkənin media qurumları arasındakı münasibətlərin daha konkret bir forma alması baxımından əhəmiyyətliliyini önə çəkib, təşəbbüsün həyata keçirilməsi ilə bağlı vəziyyətdən söz açıb. “Bu, cənab Hikmət Hacıyevin Türkiyəyə səfəri zamanı müzakirə edildi. Bu istiqamətdə addımlar atılmağa başlayıb. Yaxın zamanlarda platformanın həyata keçdiyini görəcəyik”, -deyə Səfir fikrinə aydınlıq gətirib.
