Erməni hərbi əsirlərin Azərbaycandan qayıtması problemi təcili həllini tələb edir. Məsələnin həlli bölgədə etimad mühitinin formalaşması üçün vacib şərtdir. "Baki-Baku.az" xəbər verir ki, bunu Ermənistanın xarici işlər naziri Ara Ayvazyan ölkə parlamentinin xarici əlaqələr daimi komissiyasının iclası zamanı deyib.
"Dağlıq Qarabağ münaqişəsinin qəti həlli üçün etimad mühitinin bərpası lazımdır. Ancaq etibar atmosferi dərhal bərpa olunmur. Bunun üçün hərbi əsirlərin və saxlanılmış mülki şəxslərin geri qaytarılması məsələsi həlli tapmalıdır. Bu, qonşu ölkə tərəfindən həqiqətən müsbət bir addım olacaq", - deyə Ayvazyan vurğulayıb.
Ermənistan Xarici İşlər Nazirliyinin başçısı bildirib ki, müharibə bitib, ancaq Qarabağ münaqişəsi bitməyib. Bunu isə təkcə erməni tərəfi deyil, beynəlxalq ictimaiyyət, ATƏT-in Minsk Qrupunun həmsədrləri deyir. Nazir vurğulayıb ki, hökumətin və parlament diplomatiyasının birgə səyləri sayəsində məhkumların geri qaytarılması problemi ciddi beynəlxalq dəstək alıb. "Aydındır ki, dünya ictimaiyyətinin bu məsələdə Azərbaycana təzyiqi durmadan artır. Məhkumların daha da saxlanması Bakı üçün çox problemli oldu", - deyən Ayvazyan əlavə edib ki, bölgədə sabitlik, təhlükəsizlik və sülhün yaradılması baxımından Dağlıq Qarabağın statusunun da həll edilməsi də lazımdır: "Status qərarı Qarabağ xalqının öz müqəddəratını təyinetmə hüququnun həyata keçirilməsinə əsaslanmalıdır. Bu uzun və çətin bir müddətdir. Bunun üçün etibar mühitini bərpa etmək lazımdır".
